Տաթևիկ Ռևազյանը՝ վարչապետի նախկին խորհրդականի հետ իր հարաբերությունների մասին

«Ես որևէ մեկի հետ որևէ անձնական խնդիր չունեմ, բաց եմ համագործակցելու բոլորի հետ»,- ուղիղ տեսակապի ժամանակ հայտնեց Քաղավիացիայի կոմիտեի ղեկավար Տաթևիկ Ռևազյանը՝ անդրադառնալով Նիկոլ Փաշինյանի՝ ավիացիայի գծով նախկին խորհրդական Հակոբ Ճաղարյանի հետ իր հարաբերություններին:

«Պարզ է, որ տարաձայնությունները եղել են գործնական: Ես որևէ ինտրիգի մեջ չեմ մտել, կենտրոնացել եմ աշխատանքի վրա, սակայն ճիշտ կլինի պարոն Ճաղարյանի հետ կապված մի քանի օրինակ նշել: Խնդիրներից մեկն, օրինակ, կապ ուներ հայեցակարգի հետ: Ինչպես պարոն Ճաղարյանը նշել է իր հարցազրույցի ընթացքում, մեզ հանձնարարական էր եկել, որ պետք է համատեղ հայեցակարգ մշակեինք ՀՀ-ի համար, սակայն պարոն Ճաղարյանը հայեցակարգ էր մշակել, որն իր համար վերջնական տարբերակն էր:

Երբ մենք ասում էինք, որ պետք է համատեղ անել, նա մերժում էր, ասում էր՝ կամ իր ձևաչափով ենք աշխատում, կամ չենք աշխատում: Իսկ դա ինձ համար անընդունելի է, հայեցակարգը գրելիս կարևոր է բոլորի կարծիքը, թիմային աշխատանքը»,- ասաց Ռևազյանը: