«Քաղավիացիայի վերաբերյալ հարուցված 2 քրգործերից մեկը հենց այս դրվագին է վերաբերում». վարչապետ

ԱԺ-Կառավարություն հարցուպատասխանի ժամանակ ԼՀԿ–ից Կարեն Սիմոնյանը բարձրացրեց Քաղավիացիայի շուրջ ստեղծված իրավիճակի վերաբերյալ հարցը: «Ո՞վ է պատասխանատվություն կրելու դրա համար»,- ասաց նա: Վարչապետն արձագանքեց. «Տեղի է ունեցել հետևյալը. եվրոպական համապատասխան հանձնաժողովն արձանագրել է, որ ՀՀ քաղավիացիայի կոմիտեն չի կարողանում վերահսկել ավիաընկերությունների գործունեությունը ՀՀ-ում: Այս տեղեկանքում ներկայացված է, թե ինչու չի կարողանում վերահսկել, որովհետև Քաղավիացիան Աֆրիկայում բազավորված օդանավերի նկատմամբ ունի պարտավորություններ, բայց մեր կարգավորումներով չունի լծակներ այդ պարտավորությունները կատարելու: Եվ դրա արդյունքում տեղի են ունեցել մի շարք զարգացումներ»:
Ըստ վարչապետի՝ եվրոպական կազմակերպությունը ստուգումներ է արել ընկերություններից մեկում, դրա մասին տեղեկանքն ուղարկել Քաղավիացիա: Այս կառույցի պաշտոնյան տեղեկանքի մասին չի տեղեկացրել կոմիտեի ղեկավարությանը: ՔԱԿ-ի ղեկավարը դրա մասին իմացել է իր եվրոպական գործընկերներից՝ համաժողովներից մեկի ժամանակ:
Պարզաբանումների արդյունքում ՔԱԿ-ի տվյալ աշխատակիցն ազատվել է աշխատանքից և որոշ ժամանակ անց աշխատանքի անցել այն ավիաընկերությունում, որի խախտումների վերաբերյալ տեղեկանք էր ներկայացվել:
Ն. Փաշինյանն ասաց, որ ՔԱԿ-ի վերաբերյալ հարուցված 2 քրեական գործերից 1-ը հենց այս դրվագին է վերաբերում:
Իրավիճակի մասին իմացել են ՄԱԿ-ի անվտանգության խորհրդի նիստի ժամանակ:
Վարչապետի վկայությամբ՝ հարցի լուծումը ՔԱԿ-ի կարգավիճակի փոփոխությունն է, որպեսզի կոմիտեն դառնա ինքնածախսածածկվող կառույց, ինչպես հիմա կադաստրն է, որպեսզի ունենա ֆինանսներ՝ մասնագետներ հրավիրելու, իր գործառույթները կատարելու լծակներ: Ամբողջ աշխարհում լիցենզիաները տրվում են վճարովի հիմունքով, իսկ մեզ մոտ անվճար է: