«Ստիպված եմ եղել նման մարդկանց ազատել, նույնիսկ ամենամերձավոր թիմի ներկայացուցիչների». վարչապետ

ՀՀ վարչապետ Նիկոլ Փաշինյանն ԱԺ-Կառավարություն հարցուպատասխանի ժամանակ անդրադարձավ «Իմ քայլը» խմբակցության ղեկավար Լիլիթ Մակունցի՝ կադրային քաղաքականության ու ռազմավարության վերաբերյալ հարցին: «Առհասարակ, ինչպե՞ս եք վերաբերվում հնչող քննադատություններին»,- հարցադրեց պատգամավորը:

Ն. Փաշինյանն ասաց՝ այն, որ պետական կառավարման համակարգի շատ մեծ տոկոսը շարունակել է մնալ իր տեղում, դա ևս իր՝ շատ ավելի վաղ տված խոստումներից մեկն է, որ կադրային ջարդ չի լինելու: Սակայն կադրային ջարդ չի լինելու ասելով՝ նկատի չեն ունեցել, որ պետական կառավարման համակարգը պետք է մնա նույնը:
«Ո՛չ, դա նկատի չենք ունեցել: Բայց նկատի չենք ունեցել նաև, որ պետական համակարգում եղած այս-այս մարդուն պետք է փոխարինեն այս-այս մարդիկ. հին կադրերին՝ նոր կադրեր: Ես ի սկզբանե համարել եմ, որ դա վատ մոտեցում է, որովհետև, ցավոք, մի քանի նոր կադրեր մի քանի օրվա ընթացքում ապացուցել են, որ իրենք կարող են մտնել կաբինետ և սկսել իրենց դնել իրենց նախորդի տեղում: Ես նույնիսկ ստիպված եմ եղել շատ արագ իմ նշանակած մարդկանց ազատել, ամենամերձավոր թիմի ներկայացուցիչների»:
Ըստ վարչապետի՝ դեպքեր են եղել, որ նոր կադրերը ներգրավված են եղել կոռուպցիոն գործարքների մեջ: Դատարանը դա ցույց կտա: Ն. Փաշինյանն ասաց, որ կադրային ռազամավարության իր ընկալումը եղել է այն, որ փոփոխությունները պետք է տեղի ունենան անհատի ներսում: