ԱԺ-ն քննարկում է ԿԲ նախագահի պաշտոնում Մարտին Գալստյանի թեկնածությունը

Խորհրդարանը քննարկում է ՀՀ ԿԲ նախագահի թեկնածության հարցը: ԱԺ ֆինանսավարկային և բյուջետային հարցերի հանձնաժողովն այդ պաշտոնում առաջադրել է «Իմ քայլը» խմբակցության կողմից ներկայացված Մարտին Գալստյանի թեկնածությունը:

Նրա կենսագրությունը նիստում ներկայացրեց Արտակ Մանուկյանը: Նա նշեց, որ Մ. Գալստյանը սովորել է Հարվարդի համալսարանի Ջոն Քենեդու անվան հանրային կառավարման դպրոցում: Աշխատանքային գործունեությունը սկսել է 1998 թվականին՝ ՀՀ կենտրոնական բանկում: 2018 թվականից մինչ այժմ ԿԲ խորհրդի անդամ է, դասավանդում է Հայաստանի ամերիկյան համալսարանում:
Մ. Գալստյանը հակիրճ ելույթ ունեցավ: Խոսեց կորոնավիրուսի դեմ պայքարի համատեքստում ԿԲ կատարած քայլերի մասին: Նշեց, որ ԿԲ գլխավոր խնդիրը արագ արձագանքելը և անհրաժեշտ քայլեր կատարելն է: Ըստ նրա՝ ՀՀ ԿԲ քայլերի նկատմամբ միջազգային գործընկերների արձագանքը ևս դրական է եղել:
Պատգամավորներն այժմ հարցեր են ուղղում ԿԲ նախագահի թեկնածուին:

Նշենք, որ ըստ մամուլի հրապարակումների՝ Մարտին Գալստյանը Բաբկեն Արարքցյանի փեսան է։