«Թավշյա այնքա՜ն ոչ պրոֆեսիոնալներ կան, ինչի արդյունքը տեսնում ենք պարբերաբար». ԲՀԿ

«Տեղի է ունեցել անընդունելի բան․ դա եղել է դիտավորություն, թե ոչ պրոֆեսիոնալիզմի արդյունք, դա չի փոխում տեղի ունեցածի գնահատականը: Երկու դեպքում էլ դա ինձ համար դա անընդունելի է: Ես 2 վարկածներից ոչ մեկը չեմ կարող բացառել, բայց մի բան կարող եմ ասել: Ինչի արդյունքում էլ դա եղած լինի, պիտի անպայման պատասխանատվություն կրեն, այդ թվում՝ վարչապետի մամուլի ծառայությունը, որովհետև նրանք պետք է ամենայն մանրամասնությամբ հսկեին ամբողջ գործընթացը». ապրիլի 20-ին նշեց ԲՀԿ-ական Նաիրա Զոհրաբյանը՝ անդրադառնալով վարչապետի՝ եթերից դուրս մնացած կադրերի արտահոսքին։
Նրա գործընկեր Միքայել Մելքումյանն էլ նկատեց, որ այդ միջադեպը ցույց տվեց, որ պետական կառավարման համակարգում որակի խնդիր կա:
«Շատ դեպքերում դա միջինից ցածր է»,- ասաց նա:
Անդրադառնալով վարչապետի այն հայտարարությանը, թե թավիշը չարաշահողները պետք է հեռանան, Ն. Զոհրաբյանն ասաց, որ ելակետը պետք է ոչ թե թավշյա պաշտոնյա լինելը լինի, այլ պրոֆեսիոնալիզմը:
«Թավշյա այնքան ոչ պրոֆեսիոնալներ կան, ինչի արդյունքը տեսնում ենք պարբերաբար»,- ամփոփեց ԲՀԿ-ականը: