«Որևէ մեկն այստեղ նստած չէ Շուշիի ազատագրման համար». դատախազ Գևորգ Բաղդասարյանը՝ Քոչարյանի պաշտպաններին

Ռոբերտ Քոչարյանի գործով մայիսի 8-ի նիստում դատարանը ավելի քան 5 ժամ քննում է սահմանադրական կարգի տապալման մեջ մեղադրվող Քոչարյանի խափանման միջոցը փոխելու հարցը:

Հիշեցնենք, որ պաշտպանները խափանման միջոցը փոխելու միջնորդություն էին ներկայացրել՝ պայմանավորված կորոնավիրուսով:
Մեղադրող կողմը, լսելով Ռոբերտ Քոչարյանի պաշտպանական կողմի փաստարկները, դատարանին հորդորեց մերժել միջնորդությունը:
«Չկա որևէ փաստական տվյալ, որ Երևանի «Կենտրոն» քրեակատարողական հիմնարկում կա ռիսկ COVID-19-ով վարակվելու, որ այնտեղ Ռոբերտ Քոչարյանը ունի ռիսկային կոնտակտներ: Այդ ռիսկը, եթե տեսականորեն չենք բացառում, ապա գործնականում բացառում ենք»,- ասաց դատախազ Գևորգ Բաղդասարյանը:
Նա տարօրինակ համարեց, որ նիստում պաշտպանները անընդհատ հիշատակում էին, որ դատական նիստն ընթանում է մայիսի 8-ին՝ Շուշի ազատագրման օրը:
«Որևէ մեկն այստեղ նստած չէ Շուշիի ազատագրման համար»,- դատարանում ասաց դատախազ Գ. Բաղդասարյանը:

Պաշտպանական կողմը տեղից հակադարձեց, որը լսելի չեղավ: Դատավորն էլ պաշտպանական կողմին հորդորեց լռել:
Նշենք, որ դատավոր Աննա Դանիբեկյանը նիստում նկատողություն արեց նաև տուժող կողմի ներկայացուցիչ Սեդա Սաֆարյանին: «Ի՞նչ եմ արել», հարցրեց Սաֆարյանը: Դատավորը նկատեց՝ «նիստի ժամանակ զրուցելու համար», և հիշեցրեց, որ դա կրկնվելու դեպքում դատարանը սանկցիա կկիրառի: