Շաբաթ, 01 նոյեմբերի, 2025 թ.
|
Ստեփանակերտում`   +10 °C

«Գրավն ի զորու չէ կանխել, չեզոքացնել այն ռիսկերը, որոնք բխում են պարոն Քոչարյանից». Տիգրան Եգորյան

«Գրավն ի զորու չէ կանխել, չեզոքացնել այն ռիսկերը, որոնք բխում են պարոն Քոչարյանից». Տիգրան Եգորյան
1056
Հինգշաբթի, 18 հունիսի, 2020 թ., 13:45

Այսօր Վերքաննիչ դատարանում ՀՀ երկրորդ նախագահ Ռոբերտ Քոչարյանի խափանման միջոց կալանքը փոխելու միջնորդությունները մերժելու մասին Երևանի ընդհանուր իրավասության դատարանի որոշման դեմ բողոքի քննության ժամանակ ելույթ ունեցավ Մարտի 1-ի զոհերից Գոռ Քլոյանի և Արմեն Ֆարմանյանի իրավահաջորդների ներկայացուցիչ, փաստաբան Տիգրան Եգորյանը: Նա նշեց, որ այդ որոշումը էական թերություն է պարունակում և բարձրաձայնեց պատճառներից մեկը, թե ինչու չպետք է գրավի դիմաց ազատ արձակել Ռոբերտ Քոչարյանին:

Հիմնավորելով խոսքը՝ փաստաբանը նշեց, որ գրավն ի զորու չէ կանխել, չեզոքացնել այն ռիսկերը, որոնք բխում են Ռ․ Քոչարյանից: «Հարցը գրավի էֆեկտիվության հետ է կապված. խոսքը քննությանը խոչընդոտելու մասին է: Շատ կարևոր է այդ խոչընդոտի դրսևորման բացահայտման կապակցությամբ պիտանի և արդյունավետ մեխանիզմի բացակայությունը: Այսինքն՝ անձի նկատմամբ իր համաձայնությամբ կամ ոչ համաձայնությամբ, սահմանել հսկողություն: Այս միջոցառումները միտված են ազատության մեջ գտնվելու ժամանակ վերահսկելու նրա այն գործողությունները, որոնք կարող են կապված լինել քննությունը խոչընդոտելու կամ քննության վրա ազդելու հետ: Ցավոք, էսպիսի ինստիտուտ ՀՀ օրենսդրությունը չի սահմանում, էսպիսի հնարավորություն չկա և գրավի կիրառման դեպքում որևէ վերահսկողություն Ռոբերտ Քոչարյանի նկատմամբ հնարավոր չի իրականացնել: Հետևաբար, գրավի կիրառումն այս դեպքում ի զորու չի լինելու հաղթահարել ռիսկը»,- մանրամասնեց Եգորյանը:

Հակադարձելով Տ. Եգորյանին՝ Ռ. Քոչարյանի շահերի պաշտպան Հայկ Ալումյանն ասաց, որ հարցի հետ կապված եթե անգամ որևէ ռիսկ կա, ապա դատարանն իրավասու է տեղեկանալ Քոչարյանի յուրաքանչյուր շարժի մասին. «Եթե դատարանն ուզի իմանալ, թե Ռ. Քոչարյանն ում հետ է հանդիպել, դա կարող է անել և պարտավոր է լինել պատասխանատու: Ամբողջ շարժը ցուցակագրվում է: Եթե, օրինակ, հիմնավոր կասկածներ լինեն մեղադրողի կողմից, ո՞վ ասաց, որ դատարանն իրավասու չէ ԱԱԾ-ից այդ շարժի մասին տեղեկանալ, և ո՞վ ասաց, որ ԱԱԾ-ն իրավունք կունենա դատարանին այդ տեղեկությունը չտալ»,- ասաց Ալումյանը: