Սահմանադրական փոփոխությունների նախագիծն ընդունվեց առաջին ընթերցմամբ

Ազգային ժողովն առաջին ընթերցմամբ ընդունեց ՀՀ Սահմանադրությունում փոփոխություններ կատարելու մասին նախագիծը: Նախագիծն ընդունվեց 89 կողմ, 0 դեմ և 0 ձեռնպահ ձայներով: Արդեն հայտնել էինք, որ ԼՀԿ-ն ու ԲՀԿ-ն չեն մասնակցում նիստին։

Հիշեցնենք՝ «Իմ քայլի» պատգամավոր Վահագն Հովակիմյանը օրինագիծը ներկայացնելիս պարզաբանել էր․ «Նախագիծը սահմանում է՝ ՍԴ դատավոր ընտրվում են 12 տարի ժամկետով և միայն մեկ անգամ: Օրինագիծն առաջարկում է դադարեցնել ՍԴ այն անդամների լիազորությունը, որոնք պաշտոնավարում են 12 տարուց ավելի։ Իսկ ավելի պակաս պաշտոնավարածները կպաշտոնավարեն մինչև 12 տարին լրանալը: Այսպիսով բոլոր դատավորների կարգավիճակը կհավասարեցվի: Այս օրինագծի ուժի մտնելու պահից ՍԴ նախագահի պաշտոնավարումը կդադարեցվի: ՍԴ նախագահի ընտրությունը՝ վեց տարի ժամկետով, տեղի կունենա, երբ օրինագծի ընդունումից հետո թափուր դատավորների տեղերը կհամալրվեն»։