«Այս պահանջը չներկայացնելը կփաստի, որ պաշտոնական Երևանը խամաճիկ է». Ժիրայր Սեֆիլյան

Շուշիի առանձնակի գումարտակի հրամանատար, «Սասնա Ծռեր» համահայկական կուսակցության պատվավոր ներկայացուցիչ Ժիրայր Սեֆիլյանը ֆեյսբուքյան իր էջում գրել է. «Հյուսիսարևելյան սահմանում հայ-ադրբեջանական հակամարտության սրացման հետ կապված անցուդարձը հուշում է, որ հերթական անգամ պարտված և մեր հակահարձակմանը դիմակայելու հնարավորություն չունեցող թշնամին hայկական կողմից Կրեմլի միջնորդությամբ հերթական անգամ հրադադար է խնդրում:

Միևնույն ժամանակ տեսնելով Հայկական կողմի պասիվ վարքագիծը, մասնավորապես՝ մեր ապիկար դիվանագիտությունը, ստիպված ենք փաստել, որ պաշտոնական Երևանը հակված է առանց նախապայմանների համաձայնելու հրադադարին:

Այս մասին է վկայում թեկուզ այն հանգամանքը, որ հակառակորդին առանց նախապայմանի հնարավորություն տրվեց միջդիրքային տարածքից հանելու իր զինծառայողների դիակները: Մինչդեռ Ադրբեջանում չորս հայ գերի կա, անհրաժեշտ էր փոխարենը գոնե պահանջել նրանց վերադարձնել Հայաստանին:

Բոլոր դեպքերում, որքան էլ գործող քաղաքական ղեկավարությունը սահմանափակ և հաշտվողական մոտեցումներ ունի, առնվազն պարտավոր է նախապայման դարձնել Ապրիլյան պայմանավորված պատերազմի ժամանակ մեզնից խլված 18 դիրքերի վերադարձը և 1994թ. հաստատված հրադադարի գծի վերականգնումը:

Այս նվազագույն պահանջը չներկայացնելը կփաստի, որ պաշտոնական Երևանը խամաճիկ է»: