«Մեզ համար ամենևին օգտակար չեն աշխարհի տարբեր քաղաքներում ընթացող ցույցերը». Սոսի Թաթիկյան

Հանրային կառավարման մասնագետ Սոսի Թաթիկյանը ֆեյսբուքյան իր էջում գրել է. «Մտահոգ եմ արտերկրում ցույցերի ժամանակ միջադեպերով...

Մեզ համար ամենևին օգտակար չեն աշխարհի տարբեր քաղաքներում ընթացող ցույցերը և դրան ուղեկցող միջադեպերը, հատկապես դրանք, որոնք վերածվում են ծեծկռտուքի, ուղեկցվում են դրոշ վառելով և այլն: Այդ ամենը շատ վատ տպավորություն է թողնում և ոչ միայն չի նպաստում Հայաստանի դիվանագիտական օրակարգի խթանմանը, այլև վնասում է դրան և ստվերում մեր ռազմական ու դիվանագիտական հաջողությունները:

Ես միշտ եղել եմ պրո-ակտիվ դիվանագիտության, այդ թվում նաև հանրային դիվանագիտության կողմնակից, սակայն դրանով պետք է զբաղվեն փորձագետները, լոբբիստները, հայտնի հայերը, լրագրողները, և ոչ թե այլ երկրների փողոցներում, այլ օտարերկրյա մամուլում, սոցիալական հարթակներում, մտակենտրոններում... Մանավանդ, որ այս պահին Հայաստանը լիովին ի զորու է պաշտպանել իր անվտանգությունը և օրհասական իրավիճակում չէ:

Կարծում եմ, որ այլ երկրների հայերին պետք չէ քաջալերել նմանատիպ ցույցեր նախաձեռնել: Հակառակ կողմի նախաձեռնելու դեպքում միգուցե հարկավոր է դրանց հակակշռել, սակայն հնարավորին չափ զուսպ և հավասարակշիռ ձևով, ոստիկանների ուղեկցությամբ, և պետք է ամեն կերպ խուսափել ծեծկռտուքից և դրոշ վառելու ողորմելի և վնասակար սովորությունից: Ոչ էլ պետք է զոհի կամ խաղաղություն մուրացողի դերի մեջ մտնել, հաստատ ոչ ներկայիս իրավիճակում»: