«Ժողովրդագրական իրավիճակը մարզերում մոտեցել է ճգնաժամային ցուցանիշների». ժողովրդագիր

Ժողովրդագիր, պ.գ.թ. ՄԱՀՀԻ ասոցացված փորձագետ Արտակ Մարկոսյանը ֆեյսբուքյան իր էջում գրել է. «ՀՀ մարզային բնակավայրերում ընթացող ենթակառուցվածքային ծրագրերն հույս են արթնացնում, որ ՀՀ կառավարությունը գիտակցում է մարզերի առաջ ծառացած հիմնախնդիրների սրությունը և քայլերն այդ ուղղությամբ առաջիկա տարիներին ոչ միայն պետք է կրկնապատկվեն, այլ առնվազն հնգապատկվեն, քանի որ ժողովրդագրական իրավիճակը մարզերում մոտեցել է ճգնաժամային ցուցանիշների: 2020թ. հունվար-հունիսին ՀՀ 10 մարզերում բնական աճի ցուցանիշը բացասական է եղել 447 մարդով, դեպոպուլյացիա է գրանցվել 6 մարզում՝ Լոռի, Տավուշ, Շիրակ, Սյունիք, Վայոց Ձոր և առաջին անգամ ավանդաբար ծնելիության բարձր ցուցանիշ արձանագրող Գեղարքունիքում: Նախորդ տարի այս ժամանակահատվածում դեպոպուլյացիա գրանցվել էր միայն երեք՝ Լոռու, Շիրակի և Տավուշի մարզերում: Այսօր ՀՀ բնակչության բնական աճն ապահովվում է բացառապես մայրաքաղաք Երևանի հաշվին, թեև Երևանում է բնակվում բնակչության 36 տոկոսը»: