«Հայաստանը կո՞ղմ է, որ ՀԱՊԿ-ն օգնի Բելառուսի իշխանություններին». #INTERFAX-ի հարցը Մնացականյանին

Զոհրաբ Մնացականյանը Interfax-ի թղթակցին տված հարցազրույցում խոսել է ԼՂՀ խնդրի լուծման ուղիների, Հայաստանի և Ադրբեջանի հետ Ռուսաստանի ռազմատեխնիկական համագործակցության, ինչպես նաև Բելառուսում տեղի ունեցող իրադարձությունների մասին։

- Արդյո՞ք Երևանը հետաքրքրված է Գյումրիում տեղակայված ռուսական ռազմաբազայի պահպանմամբ:
- Հայաստանը տարածաշրջանում որևէ մեկի համար սպառնալիք չէ։ Հայաստանն ու Ռուսաստանն անվտանգության ընդհանուր շահեր ունեն, և հենց այդ փոխադարձ շահերի հիման վրա ենք մենք հետապնդում անվտանգության ապահովման ընդհանուր նպատակ։ Ռազմաբազան թույլ է տալիս հասնել այդ նպատակին։
-Բելառուսում ներքաղաքական իրավիճակի հետ կապված շատ խոսակցություններ են գնում այն մասին, որ այդ երկրին օգնություն կցուցաբերվի ՀԱՊԿ-ի միջոցով, որի մեջ մտնում է նաև Հայաստանը։ Դուք համարում եք թույլատրելի և հավանական նման սցենարը։
- Բոլոր հարցերը կանոնակարգվում են իրավապայմանագրային բազայի կողմից, որն արձանագրում է անդամ պետությունների փոխգործակցության հստակ կանոնակարգ, ներառյալ անվտանգության և փոխօգնության վերաբերյալ բոլոր հարցերը: Այստեղ մենք հենվում ենք ՀԱՊԿ-ի նորմատիվ-իրավական բազայի վրա։
- Հայաստանը կողմ է, թե դեմ՝ օգնել Բելառուսին։
- Բելառուսն ու Հայաստանը ՀԱՊԿ-ի շրջանակներում դաշնակիցներ են։ Մենք աշխատում ենք միասին բազմակողմ ձևաչափերով։ Հայաստանի և Բելառուսի ժողովուրդների միջև ամուր բարեկամություն կա։ Եվ իհարկե, մենք անտարբեր չենք այն ամենի հանդեպ, ինչ տեղի է ունենում։ Մենք հույս ունենք, որ այս իրավիճակը խաղաղ լուծում կստանա։
- Հայաստանը պաշտոնապես ճանաչո՞ւմ է Լուկաշենկոյին Բելառուսի լեգիտիմ առաջնորդ:
-Վարչապետ Փաշինյանը շնորհավորել է Բելառուսի նախագահին։ Մենք կհետևենք, թե ինչպես Բելառուսի ժողովուրդը կկարողանա լուծել այդ խնդիրը։ Մենք մտադիր ենք շարունակել աշխատել Բելառուսի հետ բոլոր ուղղություններով։
- Հայաստանը դիմել է Ռուսաստանին՝ գազի գինը նվազեցնելու խնդրանքով։ Ձեր կարծիքով, «գազի» հարցը կարո՞ղ է վնասել Հայաստանի և Ռուսաստանի դաշնակցային հարաբերություններին։
- Էներգետիկայի, գազի մատակարարման հարցերը երկու դաշնակից պետությունների երկկողմ հարաբերությունների կարևորագույն հարցերն են, որոնք բավականին լայն օրակարգ ունեն: Մենք լավ ներուժ ունենք՝ բանակցել և պայմանավորվել։ Ամենակարևորը՝ պայմանավորվել։ Ես բացարձակապես վստահ եմ, որ մենք կկարողանանք համաձայնության հասնել։