«Առաջարկում եմ վիրավորանքի համար 1 մլն դրամը դարձնել 5 մլն, զրպարտության 2 մլն-ը՝ մինչև 10 մլն դրամ». Ալեն Սիմոնյան

ԱԺ փոխխոսնակ Ալեն Սիմոնյանն այսօր ԱԺ պետական-իրավական հանձնաժողովում ներկայացրեց «Հայաստանի Հանրապետության քաղաքացիական օրենսգրքում փոփոխություններ կատարելու մասին» օրենքի նախագիծը։

Լրագրողների հետ զրույցում նա հայտնեց, որ իր առաջարկով վիրավորանքի համար նախկին 1 միլիոն դրամը դառնալու է 5 միլիոն դրամ, զրպարտության 2 միլիոնը՝ մինչև 10 միլիոն:
«Ես՝ որպես մարդ, որ այս պահին ունի 6 դատական հայց զրպարտության և վիրավորանքի հետ կապված, վստահեցնում եմ՝ նախագիծը կզսպի մարդկանց՝ ստահոդ տեղեկություններ տարածելու, վիրավորելու գայթակղությունը, ինչպես նաև ինչ-որ չափով քաղաքացիներին կազատի այդ աղբից, որն այսօր լցված է համացանցում: Կարծում եմ՝ այս քայլն անհրաժեշտ է և ինչ-որ չափով նաև ուշացած»,- ասաց փոխխոսնակը:

Սիմոնյանի խոսքով՝ գումարի չափը կարող է զսպող դեր ունենալ: Օրենքի նախագծի հեղինակը հայտնեց, որ նախաձեռնությունը կեղծ օգտատերերին չի վերաբերում, որովհետև չի կարող պարզվել՝ ով է պատասխանողը:

Մանրամասները՝ տեսանյութում: