«Կոչ եմ անում երկրի ղեկավարությանն այս պլանն արդեն այսօր դարձնել քննարկման առարկա». Էդգար Առաքելյան

ԱԺ «Իմ քայլը» խմբակցության նախկին անդամ Էդգար Առաքելյանը ֆեյսբուքյան իր էջում գրել է. «Պատերազմի ավարտից հետո.

1. Պաշտոնապես հայտարարել որևէ զիջման օբյեկտիվ անհնարինության մասին և դուրս գալ «Լեռնային Ղարաբաղի կարգավորման գործընթաց» կոչվող երկարամյա ֆարսից, դադարեցնել բոլոր տիպի բանակցությունները Ադրբեջանի հետ,

2. Մոտ ապագայում՝ ամիսների ընթացքում, կազմակերպել հանրաքվե Արցախում՝ ՀՀ-ի հետ վերամիավորվելու օրակարգով,

3. Հանրաքվեից հետո միաժամանակ կազմակերպել ՀՀ կողից Ռուսաստանին Ղրիմի միացումը և ՌԴ կողմից Հայաստանին Արցախի միացումը ճանաչելու գործընթաց, որից հետո ՀՀ հետ բոլոր պայմանագրերը, այդ թվում՝ ռազմական բնույթի, կսկսեն տարածվել նաև Արցախի տարածքի վրա,

4. Իրանի սահմանի ողջ երկայնքով՝ Մեղրիից մինչև Հորադիզ, տեղակայել ռուս սահմանապահներին,

5. Լրջորեն աշխատել հակաթուրքական տրամադրված երկրների հետ՝ Արցախը Հայաստանի մաս ճանաչելու ուղղությամբ

Մեր՝ այսօր կերտվող մեծագույն հաղթանակի ընձեռած պատմական հնարավորությունները չգիտակցելը, դիվանագիտական դաշտում թույլ, վախվորած, «պինցետ-լանցետային» մաշված մեթոդներին ապավինելը մեզ կրկին վերադարձնելու են նույն արատավոր շղթային և անխուսափելիորեն հանգեցնելու են է՛լ ավելի մեծ պատերազմների ու է՛լ ավելի խոշոր արհավիրքների: Աշխարհը սիրում է ուժեղներին ու հանդուգններին (իհարկե, քանի դեռ կարմիր գծերն անցած չեն, իսկ սա կարմիր գիծ անցնել չէ): Հետևաբար, կոչ եմ անում երկրի ղեկավարությանն այս պլանն արդեն այսօր դարձնել քննարկման առարկա երկրի ներսում և արտաքին դաշնակիցների հետ խոսակցություններում:
Արցախը Հայաստան է և վերջ: Սա կարգախոսից պիտի իրականություն դառնա»: