«Վիրտուալ բանակի ստեղծումը պարզապես օրախնդիր է». Գոռ Աբրահամյան

ՀՀ գլխավոր դատախազի խորհրդական Գոռ Աբրահամյանը ֆեյսբուքյան իր էջում գրել է. «Զինված ուժերին զուգահեռ թշնամու դեմ (խոսքը զինուժի մասին չէ միայն, այլ առհասարակ կողմի՝ երկիր, հասարակություն) վիրտուալ բանակի ստեղծումը պարզապես օրախնդիր է. այն պետք է ինստիտուցիոնալացվի:

Սա զուտ պատերազմ չէ: Սա հիբրիդային պատերազմ է, որում առանձին իրավիճակներում հոգեբանական տեղեկատվական ինքնապաշտպանությունը կամ հարձակումը շատ ավելի լուրջ ստրատեգիական խնդիր կարող է լուծել, քան նույնիսկ իրական բանակը:

Եթե մեզնից շատ շատերը ներգրավված լինեն դրանում, հստակ իմանալով իրենց ամենօրյա անելիքը, ապա նախ կամա թե ակամա կառաջնորդվեին այն գաղափարով, որ թշնամին միայն արտաքին է և երկրորդ՝ ֆեյսբուքում էլ ո՛չ թշնամու տեղեկատվական-հոգեբանական դիվերսիայի ծուղակն ընկնելու, ո՛չ ավելորդ պաթոսախեղդ կամ խուճապախեղդ անելու ու ո՛չ էլ ներքին թշնամիների որս սկսելու ժամանակ չէին ունենա ու սառնասրտորեն կկատարեին իրենց «մարտական առաջադրանքը»՝ դրանից նաև ներքին բավարարվածություն ունենալով»: