«Ազատամարտիկի դին էլ դեռ չեն գտել, բայց դպրոցը երեխայի դասագրքերի գումարն է ուզում»․ Սրբուհի Գրիգորյան

ՀՀ ԱԺ մշտական հանձնաժողովներում «ՀՀ 2021 թվականի պետական բյուջեի մասին» ՀՀ օրենքի նախագծի քննարկման ժամանակ ԼՀԿ խմբակցության պատգամավոր Սրբուհի Գրիգորյանը հետաքրքրվեց ԿԳՄՍ փոխնախարար Արթուր Մարտիրոսյանից, թե ԿԳՄՍ նախարարությունն ի՞նչ ծրագրեր ունի զոհված զինծառայողների կամ զոհված ազատամատիկների՝ բուհերում սովորող երեխաների ուսման վարձը զեղչելու կամ անվճար դարձնելու ուղղությամբ։
Մարտիրոսյանը պատասխանեց, որ այս պահին մտածում են այդ ուղղությամբ. «Բուհերի ղեկավարների հետ խորհրդակցելով՝ փորձում ենք ուրվագծել օգնության չափը, ձևերը, մեխանիզմները և այլն»,- նշեց փոխնախարարը։
Սրբուհի Գրիգորյանը անդրադարձավ նաև դպրոցական գրքերի վարձավճարին. «Օրերս ինձ դիմել է ազատամարտիկի կինը։ Ամուսնու դին էլ դեռ չեն գտել, բայց դպրոցը երեխայի դասագրքերի գումարն է ուզում»,- ասաց պատգամավորը։
ԿԳՄՍ փոխնախարար Ժաննա Անդրեասյանը, արձագանքելով Սրբուհի Գրիգորյանին, ասաց, որ դասագրքերի հետ կապված տարբեր ծրագրեր են գործում, որի միջոցով այն մարդիկ, ովքեր ունեն աջակցության կարիք կարող են անվճար ստանալ դասագրքերը։