«Տնտեսության ամենաառաջատար ճյուղը պիտի դառնա ռազմարդյունաբերության համալիրի զարգացումը». վարչապետ

«Մեր պետությունը ինսիտիտուցիոնալ լրջագույն վերափոխման կարիք ունի։ Մենք պիտի ունենանք նոր տիպի բանակ, որտեղ պետք է լինեն նոր պարամետրեր»,- Հանրայինի եթերում ասաց ՀՀ վարչապետը՝ նշելով, որ բանակի մոբիլության աստիճանը պետք է անգամներով ավելանա։

Նրա խոսքով՝ այս պատերազմում հաղթեց երկու գործոն․ մոբիլ խմբերը և ԱԹՍ-ները։

«Բանակի բարեփոխումների կոնտեքստում պետք է դիտարկել նաև կանանց ներգրավվածության աստիճանի հնարավոր մեծացումը, ինչն այս համատեքստում շատ կարևոր նշանակություն է ձեռք բերում։ Մեր տնտեսության ամենաառաջատար ճյուղը պիտի դառնա ռազմարդյունաբերության համալիրի և բարձր տեխնոլոգիաների զարգացումը։ Կրթության ոլորտի բարեփոխումներն ամենակարևորն են այս ամբողջ պատմության մեջ»,- ասաց Փաշինյանը: