«Ժողովուրդը կրկին չի կարողանում ձևավորել իրեն արժանի ընտրախավ». Բորիս Նավասարդյան

Երևանի մամուլի ակումբի նախագահ Բորիս Նավասարդյանը ֆեյսբուքյան իր էջում գրել է․ «Բազմաթիվ չարիքների հետ մեկտեղ պատերազմը հնարավորություն տվեց հասկանալ՝ ով ով է, և դա շանս էր կատարելագործելու «սոցիալական վերելակները», որոնք մեզ մոտ ավանդաբար անսարք կամ կիսասարք վիճակում էին: Սակայն առայժմ, կարծես, տեղի է ունենում հակառակը: Նրանք, ովքեր կարող են օգտակար լինել երկրին և այն դուրս բերել ծանրագույն վիճակից, առանց իրենց համար որևէ ակնկալիքների, առանց էական աջակցության պետության կողմից, առանց ինքնագովազդի սուս ու փուս մեծ գործ են անում: Իսկ այդ «սոցիալական վերելակների» մոտ իրար բրթբթելով և հայհոյելով, օգտվելով խառը ժամանակներից՝ փորձում են առաջ խցկվել կամ զբաղեցրած տեղերը պահպանել աղմկոտ անբանները և անպատասխանատու ձախողվածները: Մի ժողովուրդ, որի ճնշող մեծամասնությունը պատերազմի առաջին օրվանից ցուցաբերել է անգնահատելի որակներ ու հսկայական ներուժ, կրկին չի կարողանում ձևավորել իրեն արժանի ընտրախավ: Եվ հերթական անգամ բոլորի համար հանրային, սոցիալական վարքի ստանդարտներ հաստատելու հավակնություններ է ներկայացնում այն նույն փոքրամասնություն կազմող մարդկային տեսակը, որը մեզ հասցրել է ներկա խայտառակությանը: Մի՞թե մերիտոկրատիան, իրոք, մեզ համար չէ...»: