«Օտարի նման ես վերաբերվում կողքիդ իրադարձություններին, քանի դեռ չեն կպել գրպանիդ». Կ. Հովհաննիսյան

Ռազմագետ Կարեն Հովհաննիսյանը ֆեյսբուքյան իր էջում գրել է. «Հայամետությունն այդպես էլ չեկավ առաջին պլան։ Հանուն սեփական շահի, կամ խմբակային շահի այս կամ այն պետության դեսպանատներ վազելը դարձավ բնավորություն իշխանության ղեկին հայտնվածների համար։
Հայամետությունը դիտարկվեց որպես հետամնացություն, որպես ոչ հեռանկարային, ոչ արդիական։
Հայամետությունը քո սեփականությունն է, քո տեսլականն է, որը չունի ոչ ոք։ Քո գրականությունը, քո պատմությունը, քո լեզուն, քո գիտությունը, քո կրոնը, մի խոսքով այն ամենն ինչը քո ամփոփ նկարագիրն է։
Արդեն օտարի նման ես վերաբերվում կողքիդ իրադարձություններին, քանի դեռ չեն կպել գրպանիդ, ոչինչ, որ հանուն Հայրենիքիդ հազարներով նահատակվեցին, ոչինչ, որ հանուն Հայրենիքիդ մայրերը սև հագան, զավակները որբ մնացին, կարևորը դու ես, քո զավակներն են և երջանիկ դեմքով լուսանկարներն են, որոնք ՔՈ տոնական օրն են լցնում․․․ Քանի դեռ դժբախտությունն անձնական չէ, ՔՈ տեսակն այն չի հասկանա, քանի որ դու այդպես էլ ազգայինն ու հայամետությունը չտարբերեցիր անձնական շահից ու բարեկեցությունից․․․ Տեսնես, տղերքի մարմինները մինչև Նոր տարի կգտնվեն, որպեսզի հողին հանձնեք, այն տղերքի, որոնք զոհվեցին հանուն իմ, քո ու բոլորիդ ապագայի համար՝ դժբախտցնելով իրենց հարազատների կյանքը․․․»: