«Սեփական տեղեկատվական արբանյակ ունենալու մասին խոսեցի Հակոբ Արշակյանի հետ. մեղմ ասած` ծաղրեց». Նաիրի Հոխիկյան

«Այն, ինչ տեղի ունեցավ այս պատերազմի ժամանակ, նախանշվել էր դեռևս 2016-ի ապրիլյան պատերազմում, 2020-ի հուլիսյան պատերազմում. շատ պարզ էր Թուրքիայի ու Ադրբեջանի կողմից այդ մարտավարությունը: Դեռ այն ժամանակ հրապարակային նշեցի, որ սա հարձակում է ոչ միայն Տավուշի, այլ՝ Արցախի վրա: Ռազմական շատ փորձագետներ, պաշտոնյաներ ասացին՝ ֆանտաստիկայի ժանրից է»,- ԱԺ լսումների ժամանակ հայտարարեց Միջէթնիկ հակամարտությունների փորձագետ Նաիրի Հոխիկյանը: «Երկար ժամանակ խոսում էի, որ Հայաստանը պետք է ունենա սեփական տեղեկատվական արբանյակ՝ հինգերորդ սերնդի պատերազմներին դիմակայելու համար: Վերջին անգամ այդ մասին խոսել եմ 2020թ., օգոստոսին՝ Բարձր տեխնոլոգիաների նախարար Հակոբ Արշակյանի հետ: Մեղմ ասած՝ ծաղրեց, թե դու նկատի ունես արբանյակային հեռուստաալիքները: Այնինչ Ադրբեջանը 2012-ից արդեն ստեղծել է երկու արբանյակ, ու մենք կարող էինք սեփական արբանյակով դիմակայել Բայրաքթարներին՝ ռադիոէլեկտրոնային պայքարի միջոցների օգտագործմամբ»,- հավելեց Հոխիկյանը:

Հիշեցնենք՝ խորհրդարանում շարունակվում են «Հայաստանում ստեղծված իրավիճակից դուրս գալու գործողությունների ծրագիր սահմանելու մասին» հայտարարության նախագծի քննարկումները: