«Արավուս համայնքի պահուստային հողերն ադրբեջանցիները խլում են գյուղացիներից». Թագուհի Թովմասյան

«Ահազանգս Սյունիքի մարզի Արավուս համայնքից է: Մարզի մի խումբ բնակիչներ են ինձ դիմել՝ հայտնելով, որ Գորիս-Ստեփանակերտ մայրուղու ձախ կողմում գտնվող իրենց համայնքի պահուստային ֆոնդի հողերն ադրբեջանցիները խլում են»,- ԱԺ հայտարարությունների ժամին ասաց պատգամավոր Թագուհի Թովմասյանը:

Թովմասյանի խոսքով՝ գյուղի ութ տասնյակ կամավորներ, որ պաշտպանում էին սահմանները, ստիպված են եղել նահանջել տարիներ շարունակ մշակվող իրենց հողատարածքներից: «Ահազանգի պաշտոնական պատասխանին էլ ծանոթացա: Սյունիքի փոխմարզպետը հայտարարել է, որ գյուղի հատվածներում հայկական կողմից տարածքներ չեն զիջվել: Իհարկե, հաճելի է լսել, որ պետական սահմանից մի մետր անգամ չենք զիջել, բայց իրականությունն ու պաշտոնյաների հերքումները, ավանդաբար, մեղմ ասած, հեռու են իրականությունից: Եվ ինչպես շատ դեպքերում, այս դեպքում ևս, պաշտոնյաները հերքում են այնպիսի իրադարձություններ, որոնց մասնակիցները հարյուրավոր քաղաքացիներ են»,- ասաց պատգամավորը՝ նշելով, որ այդ հերքումները բացի զայրույթից ուրիշ զգացողություն չեն առաջացնում:

«Իրականում Արավուսից 37 հեկտար հողատարածք համայնքային պահուսային ֆոնդից տրվել է ադրբեջանցիներին: 9 հեկտար հողատարածք սեփականաշնորհված է: ՀՀ քաղաքացիներն ունեն սեփականության վկայակայնները, սակայն զրկվել են իրենց հողատարածքներն օգտագործելու իրավունքից»,- հավելեց Թովմասյանը: