«Դատարանը փաստեց, որ ղալլաթ են արել, բայց Առուշանյանին որպես մեղադրյալ ներգրավելու որոշում է կայացվել»․ փաստաբան

«Դատարանը փաստեց, որ սխալ են արել, կոպիտ ասած՝ ղալլաթ են արել»,- դուրս գալով ձերբակալվածներին պահելու վայրից, ասաց Գորիսի քաղաքապետի փաստաբան Արմեն Մելքոնյանը։ Նա ասաց, որ դատարանն իր պաշտպանյալին որպես մեղադրյալ ներգրավելու մասին որոշում է կայացրել և ծանուցագիր ներկայացրել, որ ներկայանանք ՔԿ։

«Պարզվում է՝ Առուշանյանին կալանավորելու վերաբերյալ միջնորդություն է անգամ ներկայացված։ Մենք չգիտենք, թե ինչում է նա մեղադրվում։ Ուղղակի ծիծաղ է առջացնում, թե ինչի համար է մեղադրվում։ Ասվեց, որ Առուշանյանի հորը պատկանող ընկերության տարածքում հատվել են ծառեր, ինչը պետությանը պատճառել է 100 հազար դրամի վնաս։ Ի՞նչ կապ ունի Առուշ Առուշանյանը հոր ընկերության տարածքում հատված ծառերի հետ»,- ասաց նա։

Փաստաբանի խոսքով՝ դատարանը փաստեց, որ մարդը ապօրինի երկու օր ձերբակալված է մնացել։

Ա․ Առուշանյանն էլ նշեց, որ տեղի ունեցածը քաղաքական հետապնդում էր։