«Նույնիսկ գեներալները տեղյակ չէին, որ այդ դիրքերը պիտի զիջենք». Կապանի համայնքապետ

Այսօրվա քննարկման ժամանակ Կապանի համայնքապետ Գևորգ Փարսյանը նշեց, որ նոյեմբերի 9-ին եռակողմ համաձայնագիր կնքելուց հետո հայկական կողմն էլ, հակառակորդն էլ մնացած են եղել նույն դիրքերում:

«Ավելացնեմ, որ այդ համաձայնագրից հետո թշնամու կողմից ագրեսիվ վարքագիծ էլ չի նկատվել: Տպավորություն էր, որ թշնամին էլ ինչ-որ մի բանի էր սպասում»,- ասաց Փարսյանը: «Մեզ տեղեկացրին, որ մեր զբաղեցրած բնագծերի հետ կապված, որոնք Կուբաթլուի և Զանգելանի շրջանում էին, ըստ համաձայնագրի, զիջելու վերաբերյալ ոչինչ նշված չէր: Մեզ տեղեկացրին նաև, որ այդ հատվածների հետ կապված՝ լինելու են բանակցություններ»,- ասաց Կապանի համայնքապետը՝ նշելով, որ համայնքների ղեկավարները քննարկումներին չեն մասնակցել:

«Երբ բնագծերը թողնելու հրամանն իջեցվեց, մենք ակտիվ համագործակցում էինք ՊՆ հետ և կարող եմ վստահ ասել, որ նույնիսկ գեներալները, ում հետ կապ էինք պահում, տեղյակ չէին, որ այդ դիրքերը պիտի զիջենք»,- հայտարարեց Փարսյանը:

«Երբ համայնքի ղեկավարներով հանդիպում ունեցանք Պաշտպանության նախարարի հետ, հետաքրքրվեցի, թե ո՞նց եղավ, որ այդ դիրքերը պիտի զիջենք, և նա, ի զարման ինձ, պատասխանեց, որ այդ համաձայնությունն ի սկզբանե եղել է… Եթե այդ համաձայնությունն ի սկզբանե եղել է, ինչո՞ւ մենք տեղյակ չենք եղել, ինչո՞ւ ենք այդքան ամրացել դրանից հետո»,- ասաց Փարսյանը՝ նշելով, որ նոյեմբերի 9-ի փաստաթղթի ստորագրումից հետո պաշտպանության երկրորդ, երրրորդ բնագիծ են կառուցել:

Հիշեցնենք, որ «Բարգավաճ Հայաստան» խմբակցությունը կազմակերպել է աշխատանքային քննարկում՝ «Սահմանամերձ շրջաններում ստեղծված իրավիճակի, առկա խնդիրների, լուծման ուղիների, սահմանների ճշգրտման, պահպանության և անվտանգության ապահովման հարցերի վերաբերյալ» թեմայով, որին հրավիրված է Կապանի համայնքապետ Գևորգ Փարսյանը: