«Երեկ ադրբեջանցիների մի խումբ մոտեցավ մեզ». Կապանի համայնքապետ

Այսօր ԱԺ-ում քննարկման ժամանակ ԼՀԿ-ական Անի Սամսոնյանը Կապանի համայնքապետ Գևորգ Փարսյանին հարցրեց, թե այն, ինչ տեղի է ունենում Սյունիքում, արդյոք սահմանազատում է: «Այսինքն՝ տեղորոշված սահմաններին սահմանային նշանների տեղադրման գործընթաց կա՞, թե՞ ոչ»,- հետաքրքրվեց Սամսոնյանը:

«Իրականում նման սահմանազատման աշխատանքներ չեն իրականացվում՝ նշանների տեղադրումով: Ավելի շատ, ադրբեջանցիների և ռուսների մասնակցությամբ, դիրքերի տեղորոշման գործընթաց է»,- պատասխանեց Փարսյանը:

«Օրինակ, երեկ ադրբեջանցիների կողմից մի խումբ մոտեցավ՝ բանակցելու մեր ՊՆ ծառայողների հետ: Ադրբեջանցիներն առաջարկում են այն հատվածներում, որտեղ դիրքավորված ենք 200-250 մետր, յուրաքանչյուրս հետ քաշվենք, որ զինվորները շփում չունենան և դրանից կոնֆլիկտներ չառաջանան: Մեր ՊՆ-ից առաջարկություն հնչեց, որ եթե այդպես է, ապա համակարգային մոտեցում ցուցաբերենք: Այսինքն՝ ամբողջ սահմանագծի երկայնքով լինի, որովհետև հատվածներ կան, որ իրենք են եկել և սահմանի վրա դիրքավորվել: Օրինակ, Շուքուրաթազից մինչև Արաքսի ափը ադրբեջանցիներ են դիրքավորված սահմանին»,- ասաց Կապանի համայնքապետը՝ նշելով, որ հակառակորդը դրանից հետո գնացել է քննարկելու:

«Տեսնենք՝ ինչ եզրահանգման կգան»,- վերջում ասաց Փարսյանը:

Հիշեցնենք, որ «Բարգավաճ Հայաստան» խմբակցությունը ԱԺ-ում կազմակերպել է աշխատանքային քննարկում՝ «Սահմանամերձ շրջաններում ստեղծված իրավիճակի, առկա խնդիրների, լուծման ուղիների, սահմանների ճշգրտման, պահպանության և անվտանգության ապահովման հարցերի վերաբերյալ» թեմայով, որին հրավիրված է Կապանի համայնքապետ Գևորգ Փարսյանը: