«Էս ամեն ինչը հիշեք ու ինքներդ ձեզ հարց տվեք՝ պատիվ ունե՞ք». Նարեկ Մալյան

«ՎԵՏՕ» հասարակական-քաղաքական շարժման հիմնադիր Նարեկ Մալյանը ֆեյսբուքյան իր էջում գրել է. «Իշխանությունների հրահանգով ավելի քան երկու ամիս թաքցնում էին ոստիկանության զոհերի անունները: Լրագրողների, ակտիվ ու մտահոգ անհատների ճնշումներին չդիմանալով՝ երեկ վերջապես հրապարակեցին պատերազմի ընթացքում զոհված ոստիկանների անունները:
Դիմում եմ այս օրերին փողոցներում ծառայություն իրականացնող ոստիկաններին, որոնց մեծ մասին պատերազմի օրերին տարել էին առաջնագծի տարբեր հատվածներ առանց պատշաճ պատրաստության և էկիպիրովկայի, այսինքն՝ սիրելի՛ ոստիկաններ, այն իշխանությունը, որին դուք այսօր ստիպված եք փողոցում պաշտպանել, տարել էր ձեզ առաջնագծում մատաղ անելու, որպեսզի մի քանի ավել լայք հավաքեր Ֆեյսբուքում:
Հիշեք, հարգելի՛ ոստիկաններ, որ ձեր զոհվելու դեպքում իշխանությունը խորապես թքած ունեցավ զոհերի հիշատակի, նրանց ընտանիքի վշտի վրա:
Հիշե՛ք, հարգելի՛ ոստիկաններ, որ ընդդիմադիր գործիչների կատաղի պայքարի արդյունքում ձեր զոհված ընկերները վերջապես ունեցան անուն-ազգանուն...
Այն ընդդիմադիր գործիչների, ում դեմ այսօր ձեզ հանել է ձեզ կոտորող ու ձեր զոհված ընկերների հիշատակը պղծող իշխանությունը:
Էս ամեն ինչը հիշեք ու ինքներդ ձեզ հարց տվեք՝ պատիվ ունե՞ք»: