«Նաիրա Զոհրաբյանն իմ լավ բարեկամն է՝ անկախ նրանից, որ գուցե իր շեֆի վախից ինձ չի բարևում»․ Ա․ Բաբաջանյան

Այսօր՝ ԱԺ արտահերթ նիստում Նաիրա Զոհրաբյանի՝ որպես Մարդու իրավունքների պաշտպանության և հանրային հարցերի մշտական հանձնաժողովի նախագահի լիազորությունների դադարեցման մասին հարցը քննարկելիս Արման Բաբաջանյանը հայտարարեց, որ դեմ է քննարկելու որոշման նախագծին։
«Տպավորություն է, որ այս ԱԺ-ը մինչև վերջ չի գիտակցում մեր երկրում խորացող ճգնաժամի ծավալները և իր դերակատարությունն այդ գործընթացում։ Ինչպես է ստացվել, որ ձեր աչքի միջի գերանը ընդունակ չեք եղել տեսնել, բայց տեսնում եք դիմացինի աչքի շյուղը։ Ձեզ թվում է՝ Արցախյան երկրորդ պատերազմից հետո սա օրակարգային ամենակարևոր հա՞րցն է, որ պետք է քննարկվի այստեղ և դուք կարծում եք, որ հարկատուները մեզ դրա համա՞ր են փող տալիս»,- ասաց պատգամավորը՝ դիմելով իշխող ուժին։
«Նաիրա Զոհրաբյանի մի ավել-պակաս գրառումից, կարծում եմ, մթնոլորտն ավելի վատը չի դարձել, ոչ էլ այդ գրառման բացակայությունն ավելի լավը պետք է դարձներ մեր կյանքը»,- նշեց Բաբաջանյանը։
«Ես դեմ եմ լինելու այս նախաձեռնությանը, որովհետև Նաիրա Զոհրաբյանն իմ լավ բարեկամն է՝ անկախ նրանից, որ իր շեֆի վախից, գուցե, ինձ չի բարևում, բայց վստահ եմ, որ այս և հաջորդ խորհրդարաններում նա անելիք ունի»,- եզրափակեց իր խոսքը պատգամավորը։