«Հայկակը նամակ է գրում Նիկոլին, նա չի պատասխանում, որովհետև չի կարող ասել, որ հիմնադրամի փողերը մսխել են». Մ. Մինասյան

Ֆեյսբուքյան էջում հրապարակած «Requiem 6. Փողեր» խորագրով տեսանյութում Սուրբ Աթոռում ՀՀ նախկին դեսպան, Սերժ Սարգսյանի փեսա Միքայել Մինասյանը հայտնել է. «Պետությունից 8 միլիարդ դոլար գողացած անձը ասում է՝ ժողովուրդ, դա անտեսեք, ես Մոնումենտի տները կխլեմ ու կլինի լավ: Այդ տների ամբողջ արժեքը 100 մլն դոլար է. 8 միլիարդ գողացել է, խոստանում է, որ 100 մլն դոլար մի օր տալու է, այն էլ պարզ չէ, թե ում»:

Անդրադառնալով «Հայաստան» համահայկական հիմնադրամին՝ Միքայել Մինասյանն ասել է, որ պատմելու է մի պատմություն, որի անունն է՝ «Թե ինչպես Նիկոլն ու Աննան քանդեցին «Հայաստան» հիմնադրամը»
Նա նշել է, որ հայերը պատերազմի ժամանակ պատմականորեն ամենաշատ գումարն են փոխանցել հիմնադրամին. «Իսկ ի՞նչ արեց Նիկոլ Փաշինյանը. նա վերցրեց ու մսխեց բարեգործության համար ուղարկված փողը: Նիկոլ Փաշինյանը, իր դրածո, նախկին խորհրդական Հայկակ Արշամյանին հանձնարարում է 52 մլրդ 700 մլն դրամ բյուջե փոխանցել, որպեսզի կարողանա հանգիստ մսխի: Հայկակը դա անում է ինը որոշումով, և դրանցից ոչ մեկը չի ուղարկվել Խորհրդի անդամներ Ռոբերտ Քոչարյանին և Արկադի Ղուկասյանին, որովհետև նրանք կհարցնեին՝ բա այդ փողն ո՞ւր է գնում: Ինը որոշումից յոթը կորչում են, անհետանում են: ՀՀ նախագահի նստավայրից, որտեղ Հայկակի գրասենյակն է ու հիմնադրամի աշխատակազմը, այդտեղից անհետանում են ինը որոշումից յոթի բնօրինակները: Թե ուր, չգիտեմ, մենք դա կիմանանք, երբ նորմալ երկրում հարուցվի քրեական գործ: Ոստիկանությունը գաղտնի գալիս է Բաղրամյան 26, որպեսզի հասկանան, թե ուր են փողերը: Արմեն Սարգսյանը գաղտնի նամակ է գրում Հայկակին, ասելով՝ խնդիրներ կան, Հայկակն էլ, հասկանալով, որ 52 միլիարդի մսխումն իրեն ոչ ոք չի ներելու, նամակ է գրում Ֆինանսների նախարարին, թե ասա, այդ փողը որտեղ ես ծախսել: Նախարարը պատասխանում է, որ գումարը ծախսվել է ըստ բյուջեի նախատեսված կետերի: Հայկակը նամակ է գրում Նիկոլ Փաշինյանին, Նիկոլը չի պատասխանում, որովհետև չի կարող պատասխանել, որ այդ փողը մսխել են»,- պատմել է Մինասյանը:

Ըստ Միքայել Մինասյանի, Արմեն Սարգսյանն անհանգստացած է, որովհետև այժմ Հիմնադրամն անցնում է միջազգային աուդիտ, իսկ այդ աուդիտի օրենքներով, եթե դու չես ասում, թե ինչ ես արել գումարը, քո հիմնադրամը պետք է դադարեցնի իր գործունեությունը, որովհետև դու խախտել են կանոնադրություն ու միջազգային օրենքներ:

Միքայել Մինասյանը նաև ասել է, որ Արմեն Սարգսյանը խնդիրները հասկանում է և Նիկոլ Փաշինյանին ասել է, որ դու այդ փողերը պետք է հետ տաս, և ինքը դրա դիմաց կստորագրի Փաշինյանի նշանակումները. «Սա առևտուր է, որի հիմքում արյունն է ու փողը»,- ընդգծել է Մինասյանը:

Մանրամասները՝ տեսանյութում: