«Ակնհայտ է, որ այս ամենն արվեց Բաքվի հետ գաղտնի համաձայնությամբ և կոորդինացմամբ»․ Հայկ Մարտիրոսյան

Քաղաքագետ Հայկ Մարտիրոսյանը ֆեյսբուքյան իր էջում գրել է. «Հուլիսին Տավուշում զոհեր ունեցանք, ծանր մարտեր եղան, մեծ աղմուկ բարձրացավ:
Յոթանասուն հոգի մարտական խաչ ստացավ, մեկ հոգի՝ Ազգային հերոս:
Եվ այդպես էլ անհասկանալի մնաց թե ի՞նչ էին այդ մարտերը, ի՞նչ տեղի ունեցավ, ինչպե՞ս և որ ամենակարևորն է՝ ինչո՞ւ:
Իրականում ի՞նչ էր տեղի ունեցել:
Փաշինյանի հրամանով հայկական զինուժը զբաղեցրել էր մի դատարկ բլուր, որ ադրբեջանցիներն էին զբաղեցնում, ընդ որում՝ սեզոնային սկզբունքով: Ու երբ հետ էին եկել իրենց դիրք՝ ՈւԱԶ-ով, հայտնաբերել էին, որ այնտեղ հայեր են: Ու քանի որ ադրբեջանցիները իրական ոչմիթիզհողական են՝ որոշեցին այն հետ վերցնել:
Իհարկե, ոչմիթիզհողականի կեղծ իմիջ կառուցող փաշինյանի համար դա ալիբի էր՝ հանցարդարացում և նա հրամայեց մեր ուժերին ամեն գնով պահել դիրքը:
Ինչո՞ւ: Որպեսզի համոզի իր ժողովրդին թե ինքը ոչմիթիզհողական է, ոչ մի թիզ հակված չէ տալու թշնամուն, ազատագրող է և այլն:
Միևնույն ժամանակ մի դատարկ բլրի համար վճարված ծանր գինը վերածեց մեծ փիառ ակցիայի՝ Սարդարապատում պարգևատրումներ բեմադրելով:
Ընդ որում դա հատուկ այնպես արեց, որ Բաքվում դա ներկայացնեն որպես սեփական ստորացում և հայերի դեմ ռևանշը դառնա հանրային անքննելի և անհետաձգելի պահանջ:
Իհարկե, ակնհայտ է, որ այս ամենն արվեց Բաքվի հետ գաղտնի համաձայնությամբ և կոորդինացմամբ:
Հիմա գյուղեր, դաշտեր, սարեր ու բլուրներ է տալիս: Առանց մի մարտի, առանց զինվորների իսկ ներկայության: Անգամ չի տալիս: Պետության կանխածրագրված և Բաքվից պատվիրված բացակայությամբ՝ հրավիրում է գալ և վերցնել այն ամենն՝ ինչ ուզում են:
Մինչ տավուշյան մի բլրի համար կյանքեր զոհեց՝ դա ներկայացնելով որպես ազգային անվտանգության և ազգային արժանապատվության խնդիր՝ նոր, ապօրինի սահմանի երկայնքով անվերադարձ կործանվում է թե՛ ազգային արժանապատվությունը և թե՛ ազգային անվտանգությունը:
Մանրակրկիտորեն մշակված դավաճանության պրիմիտիվ մի սցենար: Սցենար, որ աշխատեց:
Սցենար, որին ժողովուրդն այդպես էլ անհաղորդ մնաց:
Եվ դեռ մնալու է»: