«Տաք տանը նստած հոդված է գրում՝ ժողովրդի զավակներին տուն հասցնելու փոխարեն»․ Կ․ Հարությունյան

Լրագրող Կարինե Հարությունյանը ֆեյսբուքյան իր էջում գրել է. «Պատերազմի առաջին օրերից մինչ հիմա ձգվող օրերի իմ մտածումը. Հայաստանն ու Արցախը երբևէ ոտքի կկանգնե՞ն:
Որքա՞ն և ի՞նչ տեսակի դեղ ու դարման է պետք հայկական ինքնիշխանության վկա այս երկու հողակտորների վերքերը բուժելու համար:
Մի քանի անգամ փորձել եմ Եռաբլուր գնալ ու չեմ համարձակվել: Երեկոյան որոշել եմ, որ առավոտյան պիտի գնամ, առավոտյան գնալս հետաձգել եմ:
Ինչո՞ւ ժողովրդի առաջ խոնարհվողը, տաք տանը նստած, հոդված է գրում՝ ժողովրդի զավակներին (զոհված, թե ողջ) տուն հասցնելու փոխարեն: Դա ի՞նչ խոնարհում է: Մի՞թե կարելի է այդպես կեղծել:
Քսան տարիների կեղծի, ստի, թալանի իրականությունից այնքան էինք ուզում ազատվել, որ չտեսանք կեղծիքի մի ուրիշ դեմքը: Ու հատուցեցինք այդ կուրության համար: Հատուցում ենք: Հատուցելու ենք այնքան ժամանակ, քանի դեռ ձևի մեջ խեղդված այս անբովանդակ իշխանությունից չենք ազատվել»: