Ուրբաթ, 22 սեպտեմբերի, 2023 թ.
|
Ստեփանակերտում`   +19 °C

«Մեր բանակը յուրօրինակ փորձություն է ապրում». Արմեն Գրիգորյան

«Մեր բանակը յուրօրինակ փորձություն է ապրում». Արմեն Գրիգորյան
298
Հինգշաբթի, 28 հունվարի, 2021 թ., 21:25

Հայաստանի անվտանգության խորհրդի քարտուղար Արմեն Գրիգորյանը շնորհավորական ուղերձ է հղել ՀՀ զինված ուժերի կազմավորման 29-րդ տարեդարձի առթիվ:

«Սիրելի՛ հայրենակիցներ,

Շնորհավորում եմ բոլորին Հայոց բանակի օրվա առթիվ՝ հայրենիքի սահմանների պաշտպանությանը զինվորագրված գեներալներից, սպաներից ու զինվորներից մինչև աշխարհազորայիններ ու կամավորականներ։
Պատահական չէ, որ այս օրը մասնագիտական տոն լինելուց բացի նաև համապետական և համազգային տոն է մեր հանրային ընկալման մեջ: Այս գիտակցումը առավել ամրացավ վերջին իրադարձությունների բերումով, երբ բոլորս մեր տեղերում անդամագրվեցինք հայրենիքի պաշտպանության գործին՝ առաջնագծից մինչև թիկունք դառնալով հայոց բանակի մեծ ընտանիքի մի մասնիկը:

Հիրավի, այս օրերին մեր բանակը յուրօրինակ փորձություն է ապրում, որից անկասկած պիտի դուրս գա առավել զորեղ, կայացած ու ժամանակի մարտահրավերներին պատրաստ: Անվտանգային նոր իրողություններին մեր բանակի ներդաշնակեցումը պիտի դառնա առաջնային հրամայական, և սրանում բոլորիս անելիքը չափազանց մեծ է:
Իհարկե, բանակի օրը տոն լինելուց զատ ունի նաև հիշատակի խորհուրդ․ այսօր մենք հիշում և ոգեկոչում ենք նաև բոլոր այն նվիրյալներին, որոնք կանգնած էին հայոց բանակի ստեղծման ակունքներում, նրանց, ում հերոսության, իսկ հաճախ և կյանքի գնով հաղթեցինք ինչպես 1991-1994 թթ. Արցախյան պատերազմում, այնպես էլ դիմակայեցինք վերջին պատերազմական գործողություններում:
Կրկին շնորհավորում եմ բոլորիս համազգային այս տոնի առթիվ: Փա՛ռք Հայոց բանակին»: