«Երևի մեր անունները գցել են մեռածների կամ անհետ կորածների ցուցակի մեջ». կամավորականներ

«Ոնց որ Գումի բազառն ըլնի, էս շենքից մի հատ խելքը գլխին մարդ դուրս չի գալիս՝ մի նորմալ բան ասի»,- ասում էր ՊՆ-ի դիմաց բողոքի ակցիա իրականացնող կամավորականներից մեկը, ով պատերազմի ընթացքում գտնվել է «Դժոխքի ձորում», բայց փոխհատուցում չի ստացել: «Մենք արժանի՞ ենք այս վերաբերմունքին, նման արհամարհանքի»:

Նրանցից մեկի կարծիքով՝ իրենց անունները հավանաբար չեն էլ ցուցակագրել. «Մեզ տանելու օրը երևի մեր անունները գցել են մեռածների կամ անհետ կորածների ցուցակի մեջ: Եթե ոչ, բա ո՞ւր են մեր անունները, ո՞ւր են»,- զարմացավ նա:

Բողոքող կամավորականների խոսքով՝ մինչև պատերազմ գնալն ամեն ինչ հստակ էր՝ ցուցակները, անունները, տվյալները, բայց երբ վերադարձան, նման խնդրի առջև կանգնեցին: «Մենք 5-րդ դասակ չենք ունեցել, էդ ո՞նց եղավ՝ ես 5-րդ դասակի գնդացրորդի օգնական եմ»,- ասաց կամավորական երիտասարդը՝ կարծիք հայտնելով, որ «երևի իմիջիայլոց գրել-քցել են, տարել են՝ մտածելով, որ «սրանք գնացին՝ էլ չեն էլ գալու...»:

ՊՆ-ի մոտ հավաքված պատերազմի մասնակիցներին զայրացնում է նաև «որոշ հայրենասերների» կողմից նախատինքի արժանանալը. «Մեզ հեռվից ամոթանք են տալիս, ասում են՝ ամոթ է, փողի համար դուրս եք եկել, բողոքում եք: Դրանք այն մարդիկ են, ովքեր կյանքում չեն կռվել, չգիտեն առաջնագիծն ինչ է, երբեք հայրենիքի կողքին չեն եղել, բայց լավ աշխատանք ունեն ու մեծ-մեծ խոսում են... բա մնայիք ձեր երկրում, ձեր հայրենիքը պաշտպանեիք»:

Հիշեցնենք՝ պատերազմի մասնակից կամավորակնները բողոքի ակցիա են իրականացնում ՊՆ-ի դիմաց՝ պահանջելով իրենց հասանելիք փոխհատուցումը: