«#Facebook-ի և #Youtube-ի հայկական կոնտենտը լցված է խուճապ տարածող հրապարակումներով». Նաիրի Հոխիկյան

Միջէթնիկ հակամարտությունների փորձագետ Նաիրի Հոխիկյանը ֆեյսբուքյան իր էջում գրել է. «Facebook-ի և Youtube-ի հայկական կոնտենտը լցված է խուճապ տարածող, բայց իրական բովանդակություն չունեցող հրապարակումներով։ Մեկը դեմքի լուրջ արտահայտությամբ հայտարարում է, թե վաղը Թուրքիան հարձակվելու է Հայաստանի վրա, մեկ ուրիշն ասում է, թե ադրբեջանցիներն ազատ մտնում են նույնիսկ Երևանի խանութներ։

Այդպիսի հրապարակումները, որոնք հիմնականում չունեն ապացույց, այլ պարզապես միտված են մարդկանց հոգեբանական իմունիտետը կոտրելուն, ի վերջո, բերում են հուսալքության խորացման, ատելության մթնոլորտի մեծացման և լայնամասշտաբ արտագաղթի։

Որ մեր պետականությունը վտանգված է, ոչ ոք չի կասկածում, որ Թուրքիան ու Ադրբեջանը սպառնալիք են մեզ համար, նույնպես կասկածից վեր է, որ մենք ունենք ձախողված իշխանություն, դա ևս մեծամասնության համար փաստ է։ Բայց էժանագին բովանդակությամբ տեսանյութեր և հոդվածներ հրապարակել՝ խուճապ տարածելով, որևէ օգուտ չենք տալիս։ Հատկապես Youtube-ում այդպիսի տեսանյութերը միտված են փող աշխատելուն, ոչ թե տեղեկություն հաղորդելուն։ Ամբողջ այդ վիդեոցանցը լցված է «ՇՈԿ, դուք կապշեք՝ իմանալով․․․» կամ «Սկանդալային բացահայտում․ ադրբեջանցիներն այսինչ բանն են արել», և նմանատիպ հիմար վերնագրերով։

Մի հավատացեք այդպիսի էժանագին հրապարակումներին, մի դիտեք այդպիսի տեսանյութեր, քանի որ դրանց հեղինակները մտածում են ոչ թե հայ հանրության և հայկական պետության մասին, այլ նման կեղծիք տարածելով կամ չոփը գերան սարքելով՝ հավաքում են հարյուր հազարավոր դիտումներ և փող աշխատում, ընդամենը։ Առաջարկում եմ կարդալ կամ դիտել այն վերլուծաբաններին կամ այն հրապարակումները, որոնք քննադատությունների և մտահոգիչ վերլուծությունների կողքին ցույց են տալիս փաստեր, ունեն չարատավորված անուն, խնդիրների կողքին տեսնում են դրանց լուծումները։ Հակառակ դեպքում՝ «փախեք, մահն է չոքել մեր դուռը» միտքը անգույն տարածքներից հրաժարվելու տրամաբանության շարունակությունն է»։