«Համառ պայքար եմ մղելու, որ անանուն աղբյուրներին հղում չտալու կետն օրենքի ուժ ստանա». Ա. Հովհաննիսյան

ԱԺ «Իմ քայլը» խմբակցության պատգամավոր Արթուր Հովհաննիսյանն այն կարծիքին է, որ իրենց առաջարկած նոր նախագիծը օգնելու է տարանջատել «բարեխիղճ լրագրությունն անբարեխիղճից»։

«Նախագիծն օգնելու է տարանջատել բարեխիղճ լրագրողներին ու ԶԼՄ-ներին անհայտ իրավակազմակերպչական ձև, անհայտ ծագումնաբանություն ունեցող ինչ-որ ռեսուրսներից, որոնք այսօր, ցավոք սրտի, երբեմն ավելի հայտնի են, քան՝ բուն լրատվական գործունեություն ունեցող կազմակերպությունները»,- լրագրողների հետ զրույցում ասաց նա։

Իշխանական պատգամավորի խոսքով՝ ներկայիս իրավիճակում խմբագրակազմ և «անուն» ունեցող ԶԼՄ-ները հղում են տալիս անհայտ ծագմամբ թելեգրամ-ալիքներին, ֆեյսբուքյան էջերին, ինչի արդյունքում, ըստ Հովհաննիսյանի, գովազդվում են այդ անհայտ ծագմամբ էջերը, ինչն էլ առաջացնում է մի շարք խնդիրներ։

«Բոլոր այն լրատվական գործունեություն իրականացնողները, որոնք չունեն նույնականացման տվյալներ, բոլոր այդ աղբյուրների վրա հղում անելը և օգտագործել այդ աղբյուրի անունը՝ գովազդելով այդ աղբյուրին, արգելվելու է այս կարգավորմամբ»,- ասաց պատգամավորը՝ հայտարարելով, որ համառ պայքար է մղելու, որ անանուն աղբյուրներին հղում չտալու կետն օրենքի ուժ ստանա։

Նշենք, որ իշխանությունն այս նախագիծը նախքան ներկայացնելը չի քննարկել լրատվամիջոցների հետ։

Մանրամասները՝ տեսանյութում։