«Լուրի պատասխանատուին նույնականացնելու վերաբերյալ ձևակերպման տակ կարող են ընկնել տարբեր երկրների կայքերը». Բորիս Նավասարդյան

«Մենք ապրում ենք մի հասարակությունում, որտեղ քաղաքացիների պահանջարկը խոսքի ազատության սահմանափակման և նույնիսկ ցենզուրայի նկատմամբ առկա է: Դա կախված է տարբեր տեղեկատվական սպառնալիքներից, որոնցից մարդիկ հոգնում են, սկսում են վախենալ, իրենց ահաբեկված զգալ: Այս պայմաններում ես վտանգավոր եմ համարում ցանկացած օրենսդրական նախաձեռնություն, որը ինչ-որ տեղ այդ պահանջարկի պատասխանն է»,- այսօր «Պայքար անանուն աղբյուրների՞, թե՞ մամուլի ազատության դեմ» թեմայով առցանց քննարկման ժամանակ ասաց Երևանի մամուլի ակումբի նախագահ Բորիս Նավասարդյանը:

«Առաջարկվող օրինագծի՝ լուրի պատասխանատուին նույնականացնելու վերաբերյալ ձևակերպման տակ կարող են ընկնել տարբեր երկրների կայքերը, որոնք ըստ այդ երկրի օրենսդրության նույնականացվող են, բայց ըստ մեր մեկնաբանության նույնականացվող չեն: Այստեղ բավականին դժվար կլինի հստակություն մտցնել, թե ինչպիսի աղբյուրներ նկատի ունենք, իսկ ցանկացած անհստակություն իր հետ բերում է խնդիրներ»,- ասաց Նավասարդյանը: