«Նախագծի ընդունումը հնարավորություն կտա կոնկրետ չափանիշների հիման վրա գույքագրել չօգտագործվող գյուղատնտեսական հողերը». Արման Խոջոյան

ԱԺ-ը երկրորդ ընթերցմամբ և ամբողջությամբ ընդունելու համար քննարկեց «Հողային օրենսգրքում լրացում կատարելու մասին» օրենքի նախագիծը, որով առաջարկվում է սահմանել գյուղատնտեսական նշանակության հողերը որպես չօգտագործվող հողեր դասակարգելու չափանիշները:

«Ներկայումս ՀՀ գրեթե բոլոր մարզերում առկա են գյուղատնտեսական նշանակության հողերի չմշակման, ոչ նպատակային և անարդյունավետ օգտագործման բազմաթիվ դեպքեր»,- ԱԺ ամբիոնից հայտարարեց ՀՀ էկոնոմիկայի նախարարի տեղակալ Արման Խոջոյանը՝ նշելով, որ, սակայն ոչ մի իրավական ակտով սահմանված չեն գյուղատնտեսական նշանակության հողերը որպես չօգտագործվող հողեր դասակարգելու չափանիշները և դրանց հաշվառման կարգը, որն էլ իր հերթին, ըստ փոխնախարարի, խոչընդոտ է հանդիսանում չօգտագործվող հողերը շրջանառության մեջ ներգրավելու համար արդյունավետ քաղաքականություն մշակելու հարցում:

«Սույն նախագծի և դրանից բխող կառավարության որոշման նախագծի ընդունումը հնարավորություն կտա կոնկրետ չափանիշների հիման վրա գույքագրել չօգտագործվող հողերը, չօգտագործման օբյեկտիվ և սուբյեկտիվ պատճառները բացահայտել և փաստահեն տվյալների հիման վրա վարել գյուղատնտեսական նշանակության հողերի արդյունավետ օգտագործման քաղաքականություն և խթանել ներդրումային գործունեությունը»,- հավելեց Խոջոյանը:

Մանրամասները՝ տեսանյութում