«Մեր անգրագիտության և անպատասխանատու վարքի համար դեռ մարդկային կյանքերով ենք վճարելու». Հ. Սահակյան

«Քաղաքացու որոշում» կուսակցության անդամ Հայկ Սահակյանը ֆեյսբուքյան իր էջում գրել է. «Ի՞նչ եք կարծում, քանի՞ հազար մարդ դեռ պիտի զոհվի, որ մենք երկրաշարժի ժամանակ համապատասխան վարքի կանոնները սերտենք՝ մեր անվտանգության վրա թքած ունենալու և անհեթեթ եզրակացություններ անելու փոխարեն:
Բնության հետ կատակ չեն անում, բնությունը հաշվի չի առնում, որ մենք հազարամյա տառապած ժողովուրդ ենք, որ ռուսն ու թուրքը մեզ չեն սիրում կամ շատ են սիրում, որ պատերազմում պարտվել ենք ու անչափ շատ զոհեր տվել, բնությունն իր «գործն» է անում:
Իսկ մեր անգրագիտության և անպատասխանատու վարքի համար, ցավոք, դեռ մարդկային կյանքերով ենք վճարելու այնքան, մինչև դասեր քաղենք, հետևություններ անենք ու քաղաքակիրթ հանրության վերածվենք»: