Ովքե՞ր են պարտադրում մասնակցել հանրահավաքին. «Հրապարակ»

«Հրապարակ» թերթը գրում է. «Երեկ ոստիկանությունը հայտարարություն տարածեց առ այն, թե տեղեկություններ կան, որ որոշ գործատուներ իրենց աշխատողներին պարտադրում են մասնակցել հանրահավաքներին, ինչն անթույլատրելի է։ Մենք ՀՀԿ-ական նախկին պատգամավոր, «Կիլիկիա» գարեջրի գործարանի սեփականատեր Հակոբ Հակոբյանից փորձեցինք պարզել՝ ինքն է՞լ է իր աշխատողներին պարտադրում կամ կոչ անում մասնակցել Նիկոլ Փաշինյանի հրաժարականի պահանջով միտինգներին։ Հակոբյանը նեղսրտեց հարցից. «Այսքան ժամանակ աշխատում եմ, որևէ մեկին որևէ բան ասած կա՞մ»։

«Այսօրվա մարդկանց ոնց ուզում, ինչ ուզում ես, ասա, մեկ է՝ իրենց իմացածով, մտածածով են շարժվում, և վերջին հաշվով՝ դա ճիշտ է»։

Իսկ գուցե Ձեր աշխատողներն առանց պարտադրանքի՞ են մասնակցում, նկատե՞լ եք։ «Ո՞նց եք Դուք կարծում, երբ հոսքագիծն աշխատում է, կարո՞ղ է մեկը մնա, մնացածը գնան։ Ամեն մեկն իր ֆունկցիան է կատարում։ Ես պարապ աշխատողներ չեմ ունեցել և չունեմ։ Հոսքագծում մի աշխատողը չեղավ, հոսքագիծը չի աշխատի»։

Կարող են հոսքագիծն անջատել ու գնալ հանրահավաքի, ինչպես 18-ին էին անում։ «Այդ դեպքում, երբ խանութներում գարեջուր չեղավ, չե՞ք գրելու՝ գարեջուր չկա»,- կատակեց նա՝ շեշտելով, որ իր «թեզը» մշտապես եղել է այն, որ սեփական խելքով ընտրություն կատարեն, ոչ թե ինչ-որ մեկի ասելով»։ Առավել մանրամասն՝ թերթի այսօրվա համարում։