«Նրա պաշտոնավարման շրջանում չի զոհվել Վրաստանի 5․000 երիտասարդ քաղաքացի…». Էդգար Ղազարյան

ՍԴ աշխատակազմի ղեկավար Էդգար Ղազարյանը ֆեյսբուքյան իր էջում գրել է. «Վրաստանի վարչապետ Գեորգի Գախարիան հրաժարական է տվել: Նրա պաշտոնավարման շրջանում չի զոհվել Վրաստանի 5․000 երիտասարդ քաղաքացի, 12․000 երիտասարդ վրացիներ չեն կորցրել իրենց առողջությունը, Վրաստանը չի կորցրել ավելի քան 10․000 քառ․ կմ տարածք, Վրաստանի պետությունը չի կրել միլիարդավոր դոլարների վնասներ, Վրաստանի պետական կառավարման համակարգը կոլապսի չի ենթարկվել, Վրաստանի Սահմանադրական դատարանում փողոցից դատավորներ չեն հայտնվել քաղաքական պատվերներ կատարելու համար, Վրաստանի արտաքին պետական պարտքը չի կրկնապատկվել․․․
«Ես որոշում եմ ընդունել թողնել զբաղեցրածս պաշտոնը: Իհարկե, ես հավատում եմ և ուզում եմ հավատալ, որ այս քայլը կօգնի նվազեցնելու բևեռացումը մեր երկրի քաղաքականության մեջ, քանի որ ես համոզված եմ, որ մեր միջև բևեռացումն ու առճակատումը ամենամեծ ռիսկն են մեր երկրի տնտեսական զարգացման ապագայի և բոլոր տեսակի ճգնաժամերի հաղթահարման ճանապարհին»,- հայտարարել է Գախարիան:
Ահա թե երբ կարող են հրաժարական տալ խորհրդարանական կառավարման համակարգ ունեցող երկրների կառավարությունների ղեկավարները։ Մյուս բոլոր դեպքերում՝ հանցագործություն կատարած բոլոր պաշտոնյաները պետք է պատասխանատվության ենթարկվեն և գամվեն պատմության անարգանքի սյանը»։