«Մարզպետն ինձ աշխատանքից ազատել է վարչապետի հրաժարականը պահանջելու համար». Ա. Եդոյան

Վանաձորի թիվ 3 պոլիկլինիկայի տնօրեն, մարզի գլխավոր ուռոլոգ Արտակ Եդոյանին մարզպետ Արամ Խաչատրյանն ազատել է աշխատանքից՝ առանց տեղեկացնելու, թե որն է պատճառը:

Ըստ Արտակ Եդոյանի՝ ազատման պատճառը եղել է այն, որ Հայաստանի բժշկական համայնքի ներկայացուցիչները հայտարարություն էին տարածել՝ պահանջելով վարչապետ Փաշինյանի հրաժարականը, ինչի տակ ստորագրել է նաև ինքը:

«Մարզպետն ինձ ասաց, որ պատճառ չկա: Ասաց՝ իմ լիազորությունների սահմաններում որոշել եմ Ձեզ ազատել աշխատանքից: Այնուհետև հարցրեց՝ ինչո՞ւ եք Նիկոլին դեմ: Ասացի՝ ելնելով երկրի իրավիճակից, պատերազմի արդյունքներից և Ձեր այս հրամանից. այ դրա համար եմ դեմ Նիկոլին: Ես ենթադրում եմ, որ էս ամեն ինչն ունի քաղաքական ուղղվածություն, որովհետև մինչ այդ ես մեսիջներ եմ ստացել տարբեր մարդկանցից»,- «Lori TV»-ի եթերում ասել է Եդոյանը: