«Ինձ համար զարմանալի էր...». Ռուբեն Մելիքյան

«Ինձ համար զարմանալի էր, որ ԳՇ արդեն նախկին պետ Օնիկ Գասպարյանը երեկ ընդունեց այն մեկնաբանությունը, համաձայն որի՝ իրավունքի ուժով իր լիազորությունները դադարեցված են համարվում: Կային իրավաբաններ, ովքեր ոչ միայն հակառակ մոտեցումն էին պնդում, այլև համոզիչ կերպով հիմնավորում: Բայց Օնիկ Գասպարյանն ընտրեց Վարչական դատարան դիմելու տարբերակը, ինչը նրա անձնական գործն է, մինչդեռ շատերն ունեին բոլորովին այլ ակնկալիքներ»,- «Հայելի» ակումբում ասուլիսի ժամանակ հայտարարեց իրավապաշտպան Ռուբեն Մելիքյանը՝ հավելելով, որ անձի հերոսացումը մեր հասարակության արատներից մեկն է. «Հերոսացնել մարդկանց՝ առանց բավարար հիմքի, ստեղծել կուռքեր, հետո այդ կուռքերի ինչ-որ վարքագիծ համարել ոչ ճիշտ, հետո ունենալ հիասթափության մեծ չափաբաժին... Թող սա դաս լինի բոլորիս, որ պետք չէ մարդկանց հերոսացնել»: Նա հիշեցրեց, որ Օնիկ Գասպարյանը գեներալ-գնդապետի կոչում ստացել էր Նիկոլ Փաշինյանի կողմից: