««Դատական օրենսգրքում» արված փոփոխություններն իրավաբանությունից կիլոմետրերով հեռու են». Հ. Խուդոյան

«Օրենքի փոփոխություններում ամենախնդրահարույցը, երևի թե, արդեն իսկ եղած գործը դատավորից վերցնելու և մեկ այլ դատավորին հանձնելու նախաձեռնությունն է, որի պրակտիկան ես ոչ մի տեղ չեմ տեսել: Դա իրավաբանությունից կիլոմետրերով հեռու որոշում է»,- «168 ժամ»-ի եթերում հայտնել է փաստաբան Հովհաննես Խուդոյանը՝ անդրադառնալով «Դատական օրենսգրքում» կատարված փոփոխություններին, ըստ որոնց, մասնավորապես, ընդլայնվում են ԲԴԽ-ի լիազորությունները:
Նրա խոսքով՝ այժմ կա նման կարգավորում, երբ կարող է դատավորից գործ վերցվել, եթե դատավորն առողջական խնդիրների պատճառով չի կարող գործ քննել. «Բայց հիմա խոսքը ոչ թե օբյեկտիվ անհնարինության մասին է, այլ դատարանի գործողությունները գնահատման ենթարկելու: Այսինքն, եթե որևէ դատավորի աշխատանք չի գոհացնում, կարելի է այդ գործը վերցնել ու տալ ուրիշ դատավորի՝ պատճառաբանելով, որ նա լավ չի տիրապետում: Խնդիրն այն է, որ այն դատավորը, որը լավ չի տիրապետում դատական պրոցեսներին, պետք է ընդհանրապես դատավոր չլինի: Եթե նա պարբերաբար խայտառակ խախտումներ է թույլ տալիս, կա համապատասխան ընթացակարգ՝ կարգապահական պատասխանատվության մեխանիզմներով»,- նշել է փաստաբանը:
Խուդոյանի խոսքով՝ ԲԴԽ-ն այս փոփոխությունների համաձայն՝ կարող է կամայական մի գործ համարել խիստ բարդ և որոշել դատավորների եռյակ, որոնցից վիճակահանությամբ որոշվելու է՝ ով է քննելու տվյալ գործը:

«Բայց ԲԴԽ-ն նախ պետք է գնահատի, որ այս գործը կարևոր է, պատասխանատու. ի՞նչ չափանիշերով է գնահատելու: Պիտի ծանոթանա գործի նյութերին, որը, ենթադրենք, բարդ, 100 հատորանոց գործ է ու գտնվում է Առաջին ատյանում, պիտի գնահատի՝ բա՞րդ է, թե՞ ոչ: Ընդ որում, ԲԴԽ-ն ամբողջական կազմով պետք է գնահատի գործի բարդությունը...: ԲԴԽ-ն այս պարագայում պետք է կատարի Առաջին ատյանի դատարանի դեր»,- ասել է նա:

Փաստաբանի կարծիքով՝ իրականում այս փոփոխությունների հետևում թաքնված է այն, որ այդ բարդագույն գործերը լինելու են այն գործերը, որոնք ունենալու են քաղաքական ենթատեքստ. «Այո՛, գուցե խնդիր է, երբ առաջին օրը դատավոր դարձած անձին տալիս են քննելու պետական դավաճանության վերաբերյալ գործ: Հնարավոր է, որ այդ դատավորը պատրաստ չլինի նման գործ քննելու, բայց եթե շարժառիթն անկեղծ է, ուղղակի կարելի է ստաժով որոշել, որ դատավորը կարող է ծանր հանցագործություններ քննել 2 տարի աշխատելուց կամ որոշակի վերապատրաստում անցնելուց հետո»,- ասել է Հովհաննես Խուդոյանը:

Մանրամասները՝ տեսանյութում: