«Հրաժարվում եք պատասխանել իմ հարցին․ կոչ եմ անում գործընկերներիս չքվեարկել ձեր օգտին»․ Հովհաննիսյանը՝ Հայկյանցին

Այսօր ԱԺ-ում, ՎՃռաբեկ դատարանի դատավորի ընտրության երկրորդ փուլում «Իմ քայլը» խմբակցության պատգամավոր Արթուր Հովհաննիսյանը, դիմելով Վճռաբեկ դատարանի դատավորի թեկնածու Արմեն Հայկյանցին, ասաց․ «Դուք խոսեցիք քաղաքականության և դատական համակարգի սերտաճածության մասին։ Ուզում եմ պատմեք ձեր քաղաքական կենսագրության մասին՝ ՕԵԿ-ից մինչև ՀՀԿ և ասեք, թե ինչպես կերաշխավորեք մեզ, որպես ԱԺ պատգամավորների, որ քաղաքական կենսագրության ընթացքում ունեցած ձեր կապերը ազդեցություն չեն ունենա ձեր պաշտոնավարման վրա՝ որպես Վճռաբեկ դատարանի դատավոր»։

Արմեն Հայկյանցը նկատեց, որ պատգամավորը լավ հարց է բարձրացրել։

«Շատ կուզեի, որ այդ և նմանատիպ հարցերը լինեին առաջին փուլի ընթացակարգային քայլերի ընթացքում։ Երկրորդ փուլում կանոնակարգ սահմանադրական օրենքը նման քայլ չի նախատեսում և, պատասխանելով հարցին, կհակասեմ իմ դիրքորոշմանը»,- ասաց նա։

«Այսպիսով, դուք հրաժարվում եք պատասխանել իմ հարցին, հետևաբար կոչ եմ անում ԱԺ իմ գործընկերներին ձեր օգտին չքվեարկել»,- հայտարարեց Հովհաննիսյանը։