«Սուտը ստի վրա եք դնում, սուտը ստով հերքում եք». Անի Սամսոնյանը՝ Փաշինյանին

«Ձեր կողմից արվող հայտարարությունների մեջ մենք ստիպված ենք փնտրել հակասություններ և դրա մեղավորը Դուք եք»,- այսօր ԱԺ-Կառավարություն հարցուպատասխանի ժամանակ դիմելով վարչապետ Փաշինյանին՝ ասաց ԼՀԿ պատգամավոր Անի Սամսոնյանը:
Նա որպես օրինակ նշեց ՍՈՒ-30-ների հրթիռների հայտնի միջադեպը:

«Ձեր հայտարարություններով, սուտը ստի վրա դնելով, սուտը ստով հերքելով այլևս մենք չենք հասկանում՝ ո՞րն է ճիշտ և ո՞րն է սխալ, և ժողովուրդը կարիք ունի հասկանալու՝ այն ինչը որ դուք ասում եք, ճի՞շտ է, թե՞ դա սուտ է: Ե՞րբ է իշխանությունը դադարելու ստել, մանիպուլացնել և հասարակության համար ստեղծել մի իրավիճակ, որ մարդիկ խճճվեն այդ ստի մեջ»,- ասաց Սամսոնյանը:

Թեպետ հարցն ուղղված էր Փաշինյանին, բայց ընդդիմադիր պատգամավորին պատասխանեց փոխվարչապետ Տիգրան Ավինյանը; Նա հայտնեց, որ արդեն հանգամանալից պատասխան տրվել է այդ հարցին և այլ մեկնաբանության անհրաժեշտություն չկա:

«Պարո՛ն Ավինյան, Ձեզ բարեկամաբար խորհուրդ եմ տալիս. սուտը տնաքանդություն է: Այսօր Ձեր իշխանությունը հիմնված է ստի վրա: Խնդրում եմ, դադա՛ր տվեք, կա՛նգ առեք, ժողովուրդն արդեն հոգնել և խճճվել է»,- ասաց Սամսոնյանը:

Ավինյանը հայտարարեց, թե Սամսոնյանի մեկնաբանությունները չափից շատ սուբյեկտիվ են՝ նշելով, որ վերջինը մանիպուլյացիայով է զբաղված: