«ՍԴ որոշումից չընկնե՛ք ապոկալիպտիկայի գիրկը». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «ՍԴ որոշման մասին համառոտ: Գուցե նաև մի քիչ շտապ արձագանք, բայց գրում եմ, քանի որ այդ հանգամանքի մասին խոսել եմ դեռևս այն ժամանակ, երբ մարտիմեկյան գործը սկսում էր նոր-նոր:
Ասել եմ տարբեր հարցազրույցների և նաև հոդվածների միջոցով, որ, եթե մենք բացահայտում ենք Մարտի 1, ապա պետք է բացահայտենք մի կողմից տասը սպանությունը կոնկրետ, մյուս կողմից՝ Հայաստանում մարտի 1-ի հանգեցրած համակարգը ամբողջությամբ, իր ամբողջ ընթացքով: Մարտի 1-ը Հայաստանի հետխորհրդային պատմության բարդ փազլի ընդամենը մի ողբերգական դրվագ է: Այսինքն՝ այդ գործի հանրային-պետական նշանակությունը չպետք է լիներ պարզապես Ռոբերտ Քոչարյանին բանտ նստեցնելը:
Միաժամանակ, էստեղ էր նաև Քոչարյանի, այսպես ասած, «խոհանոցային կռվանը»՝ մենք բոլորս մոտ երեք տասնամյակ, ըստ էության, կառուցել ու բյուրեղացրել ենք մեկ համակարգ, ինչու՞ ես պետք է դրա համար հայտնվեմ բանտում, իսկ մյուս երկու նախագահները, օրինակ՝ ոչ:
Եվ էդ իմաստով, կարծում եմ, ոչ միայն խորհրդանշական է, այլ նաև պատճառահետևանքային ուղիղ կապով կապված, որ ՍԴ որոշումից մեկ օր առաջ հավաքվում են հինգ նախկին նախագահները: Նախորդ գրառմանս մեջ ակնարկել էի, որ հանդիպումը կապված է մարտիմեկյան գործի հետ: Բայց նաև, ինչպես նշեցի, այդ գործն էլ հայկական հետխորհրդային պետականության փազլի մի դրվագն է ընդամենը: Փազլ, որն անկասկած հավաքվել ու հավաքվում է Հայաստանից դուրս:
Մեկ էլ մի բան՝ հիմա էլ ՍԴ որոշումից չընկնե՛ք ապոկալիպտիկայի գիրկը և զգայականության գիրկը: Չմոռանաք, Հայաստանի և Արցախի դեմ ուղիղ պատերազմ է եղել, որից հետո անգամ մենք պետք է չընկնենք ապոկալիպտիկ տրամադրությունների և հուսահատության մեջ: Դա մեզ արգելել են հայկական պետականության համար կյանք տված մեր տղերքը: Նրանք էդ դաժան պատերազմին տալով կյանքը, ապրողներին արգելել են տապալվել ապոկալիպտիկայի մեջ:
Հայաստանի, ՀՀ քաղաքացու ոչ մի խնդիր ՍԴ որոշումից չի փոխվել ու չի փոխվում, այլ ընդամենը ավելի է ընդգծվում: Հայաստանի ինքնիշխան պետականության հեռանկարը ընկած է հանրության մտածողության խորքում: Էդտեղ է փոփոխությունը՝ քայլ առ քայլ, քար ծակող կաթիլի համառությամբ: Հետևաբար էդտեղ է Հայաստանի իրական քաղաքականության դաշտը: Ով կարողանում է՝ աշխատում է էդ դաշտում, ով ոչ՝ թող ինքնամեկուսանա ապոկալիպտավիրուսի հետ»: