«Նման բաներ չեն ներվում ո՛չ պատմության, ո՛չ բնության, ո՛չ էլ որևէ օրինաչափության կողմից». Տարոն Սիմոնյան

ԼՀԿ պատգամավոր Տարոն Սիմոնյանը ֆեյսբուքյան իր էջում գրել է. «Բավարար է մեկ անգամ շեղվես քո ուղեծրից, և քո թշնամիները, մրցակիցները, բարեկամներն ու դաշնակիցներն, անգամ՝ բնությունը հակազդելու են քեզ, երբեմն՝ անակնկալ (նույնիսկ իրենց համար), երբեմն՝ կործանարար։
Ասես՝ ամբողջ համատիեզերական տեսանելի ու անտեսանելի համակարգը չի հանդուրժում, երբ կառուցվածքային հոսքերում շեղում է տեղի ունենում, և ամեն ռեսուրս ուղղորդվում է հավասարակշռության բերելու համար։
Սա քաոսից պաշտպանվելու համակարգի հետադարձ դրական կապն է։
Սա այն էր, ինչ տեղի ունեցավ նաև բոլորովին վերջերս, երբ որոշակի քաղաքակրթական առաքելություն ունեցող ազգային միավորը, տվյալ պարագայում՝ հայերս, սեփական ռեսուրսները համակենտրոնացնելու և արդյունավետ օգտագործելու իրեն ընձեռնված բացառիկ հնարավորությունն ի չիք դարձրեց, ավելին՝ եղածն էլ ուղղորդեց ներսում հակադրություն գեներացնելու համար։
Պտղաբեր կարող էր լիներ այդ հակադրությունը, եթե դա լիներ պետականության գաղափարների և միևնույն հորիզոնին տանող միջոցների, այլ ոչ թե կենցաղային քաղաքականության և պետական քաղաքականության միջև։
Իսկ ինչպես հայտնի է, քաղաքական հասունության պակասը փոխհատուցվում է պետականությամբ, որովհետև պետականությունը որակ է, քանակ չէ ...
Նման բաներ չեն ներվում ո՛չ պատմության, ո՛չ բնության, ո՛չ էլ որևէ օրինաչափության կողմից։
Ցավն այն է, որ դրա համար պատժվում են ոչ այնքան նման որոշումներ կայացնողները, այլ ամբողջ ազգը և նրա ամենամեծ ներուժը կրողները։
Լուծումը կա. այն պարզ է իր ձևի մեջ և բարդ՝ բովանդակության։
Լուծումը սեփական ուղեծիրը գիտակցելն է և դրանով ընթանալը՝ #ՀայկյանՈւղեծիր...»: