«Պետք է ապրել, շատանալ ու զարգանալ թշնամի թուրքի կողքին. ուրիշ ճար չկա». Ռոբերտ Ղևոնդյան

Քաղաքագետ Ռոբերտ Ղևոնդյանը ֆեյսբուքյան իր էջում գրել է. «Ես էլ եմ հայ ու թուրքն իմ թշնամին էլ է։ Չի կարող թուրքը իմ թշնամին չլինել, քանի դեռ չի վճարել ինձ հայրենազրկելու ու կիսատելու համար, քանի դեռ չի վերադարձրել ինձանից գողացած հայրենիքս ու գոնե ներողություն չի խնդրել գերդաստանս կոտորելու համար։
Բայց թշնամու հետ էլ պետք է հարաբերվել, առավել ևս մի թշնամու հետ, որը տասնյակ անգամներ գերազանցում է քանակով, հզորությամբ ու ֆինանսապես։ Թշնամու հետ էլ պետք է խոսել ու փորձել կողքին ապրել, եթե այլ տարբերակ չունես։ Իսկ այլ տարբերակը այլ կողմերում «պապաներ» ման գալն է, որ թուրքին ասեն «դրանց շատ մի նեղի», մենք էլ էդ ասելու դիմաց ինչ ունենք չունենք հանենք նվեր տանք․․․
Հայատյացությունը թուրքի տեսակն է, կենսակերպը, ապրելու իմաստը շատ դեպքերում։ Թուրքը մեզ բարեկամ լինել չի կարող։ Պետք է խոսել թշնամի թուրքի հետ, հարաբերություններ զարգացնել թշնամի թուրքի հետ, առևտուր անել թշնամի թուրքի հետ, ապրել, շատանալ ու զարգանալ թշնամի թուրքի կողքին։ Ուրիշ ճար չկա»: