«Շտապեմ հիասթափեցնել անուղղելի միամիտներին»․ Արմեն Աշոտյան

ՀՀԿ փոխնախագահ Արմեն Աշոտյանը ֆեյսբուքյան իր էջում գրել է․ «Մինչ մենք կենսական ջանքեր ենք գործադրում փոսից դուրս գալու համար, մեր շուրջը շարունակվում են լրջագույն գլոբալ և տարածաշրջանային զարգացումները, որոնք անմիջապես ազդում են մեզ մրա։
Այսպես, այսօր Անկարայում տեղի ունեցան Էրդողանի բանակցությունները Եվրոպական խորհրդի նախագահ Շառլ Միշելի և Եվրահանձնաժողովի ղեկավար Ուրսուլա Վան դեր Լեյենի հետ։
Արցախյան վերջին պատերազմի ընթացքում Թուրքիայի բացահայտ եւ ցինիկ հակահայկականությունը եւ ԵՄ-ի բացահայտ և ցինիկ անտարբերությունը հասկանալի են դարձնում իմ մեծ հետաքրքրությունը այս հանդիպումների հանդեպ։
Շտապեմ հիասթափեցնել անուղղելի միամիտներին. Արցախի հետ կապված թուրքական ագրեսիան և իսլամիստ գրոհայինների թեման ընդհանրապես չեն բարձրացվել ԵՄ պաշտոնյաների կողմից։ Բայց օրինակ Վան դեր Լեյենը խոսել է Լիբիայից գրոհայիններին հեռացնելու անհրաժեշտության մասին։
Չի խոսվել հայերի հանդեպ գործած վայրագությունների և մեր իրավունքների մասին, բայց քննադատվել է Ստամբուլյան կոնվենցիայից Թուրքիայի դուրս գալու փաստը։
Թուրքիայի համար խելահեղ պայքարը շարունակվելու է Վաշինգտոն-Բրյուսել և Մոսկվա-Պեկին զույգերի միջև, ինչն այս փուլում հմտորեն օգտագործվում է և օգտագործվելու է Էրդողանի կողմից, այդ թվում՝ Հայաստանի և հայերի դեմ։
Բայց այլոց մեղադրելուց առաջ կրկին հիշեք. հայկական շահերը պիտի հետաքրքիր լինեն նախ Երևանին, նոր հետո՝ Բրյուսելին, Մոսկվային կամ Վաշինգտոնին»։