«Դվին»-ը դահլիճ չի տրամադրել ՀԱԿ-ին․ «Հրապարակ»

«Հրապարակ» թերթը գրում է. «Ըստ մեզ հասած տեղեկությունների՝ Երևանի «Դվին» հյուրանոցը, որը միջազգային շուկայի համար ներկայանում է Hayastan Hօtel Resort անվամբ, ՀՀԿ-ական իշխանության լավագույն ավանդույթների ուժով սկսել է քաղաքական ուժերին միջոցառումների համար տարածք կամ դահլիճ չտրամադրել:

Ընդ որում՝ մի քանի շաբաթ առաջ նման դիրքորոշում չեն ունեցել, «Դվինի» դահլիճը վարձակալելու հարցով դիմած ՀԱԿ-ին, օրինակ, չի ասվել, թե քաղաքական միջոցառումների համար տարածք չեն տրամադրում: Թե մի քանի շաբաթում ինչ է փոխվել, արդյոք «Դվինի» սեփականատեր Արտակ Թովմասյա՞նն է որոշել մերժել «կոնկուրենտ» քաղաքական ուժին, որ ինքը միակ քաղաքական էլեմենտը լինի «Դվինի» տարածքում, թե՞ նրան ՀՀ իշխանությունից ցուցումներ կամ ընդդիմության այլ թեւերից հորդորներ են եղել՝ դժվար է կռահել:
Փաստ է, որ Թովմասյանն իր քաղաքական ամբիցիաների մասին է բարձրաձայնել, փաստ է, որ «Դվինը» բազմիցս ընտրվել է որպես իշխանական միջոցառումների անցկացման վայր՝ ՔՊ-ի քաղաքական միջոցառումներից մինչև Francophonie-ի ճաշկերույթ ու Աննա Հակոբյանի արկածախնդիր դրամահավաքներ, և հիմա առնվազն արտառոց է, որ մերժում են վճարովի ծառայություններ մատուցելու առաջարկը:

ՀԱԿ-ից հաստատեցին մեր տեղեկությունը, որ դիմել էին «Դվինի» դահլիճում մայիսի 1-ին ՀԱԿ համագումարն անցկացնելու համար, նախնական համաձայնությունը կայացվել է, ապա հրաժարվել են դահլիճը վարձակալությամբ տրամադրել իրենց՝ քաղաքական միջոցառումներից ձեռնպահ մնալու պատճառաբանությամբ»:

Առավել մանրամասն՝ թերթի այսօրվա համարում։