«Բանակը մի՛շտ պայքարել է, բացատրել, առաջարկել, բայց այդ ամենն ընթացել է շատ դանդաղ». Գասպարյանի խորհրդական

ՀՀ ԶՈւ Գլխավոր շտաբի նախկին ղեկավար Օնիկ Գասպարյանի խորհրդական Վլադիմիր Պողոսյանը «Սպուտնիկ Արմենիայի» եթերում պատասխանելով այն հարցին, թե կոնկրետ ինչպիսի միջոցներ է առաջարկել բանակը նախապատերազմական շրջանում՝ որպես կանխատեսվող սպառնալիքների հակազդեցություն, նշել է աշխարհազորի մասին օրենքը։

Նշենք, որ օրենքն ուղղված էր ռազմական շրջանում մոբիլիզացիայի համակարգը կատարելագործելուն։ Օրենքն առաջարկվել է դեռ անցած տարվա օգոստոսին, քննարկվել տարբեր մակարդակներում, բայց այդպես էլ չի ընդունվել։ Պողոսյանը եթերի ընթացքում նշել է, որ պատերազմին անապատրաստ լինելը, պատերազմի ծանր հետևանքները քաղաքական ղեկավարության գիտելիքների պակասից էին, վերջինի անզուսպ հավակնություններից, ինչպես նաև՝ կառավարման համակարգում տիրող քաոսը։

«Մշտական կադրային խառնաշփոթի և անկայունության պայմաններում, երբ երկիրը բառացիորեն ցնցվում է, իսկ կարճ ժամանակահատվածում փոխվում են հատուկ ծառայությունների 4-5 ղեկավարներ, Գլխավոր շտաբի երեք պետ, դրան ավելացրած խորհրդարանում գտնվող անփորձ «երեխաները», որոնցից շատերը չեն ծառայել բանակում, դժվար է ինչ-որ արդյունավետ բան կառուցել նման երկրում։ Իսկ բանակի հնարավորությունները և լիազորություններն անսահման չեն։ Բանակը մշտապես պայքարել է, ապացուցել, բացատրել, առաջարկել, բայց այդ ամենն ընթացել է չափազանց դանդաղ տեմպերով»,- ասել է Պողոսյանը։

Մանրամասները՝ տեսանյութում: