Վահե Հակոբյանի և Հրաչյա Հակոբյանի հանդիպումը կայացավ, մենամարտը՝ ոչ

ԱԺ «Իմ քայլը» խմբակցության պատգամավոր, վարչապետի պաշտոնակատար Նիկոլ Փաշինյանի աներձագ Հրաչյա Հակոբյանի և «Վերածնվող Հայաստան» կուսակցության նախագահ, Սյունիքի նախկին մարզպետ Վահե Հակոբյանի հանդիպումը կայացավ, մենամարտը՝ ոչ։ Հրաչյա Հակոբյանը նշեց, որ ինքը ժամանել է միայնակ՝ առանց թիկնապահների՝ որպես ԱԺ պատգամավոր է և Վահե Հակոբյանին հրավիրում է ուղիղ եթերում բանավիճելու կամ երկխոսելու։

«Ես չեմ եկել ռինգ մտնելու և բոքսի օրենքերով կռվելու, առավել ևս որ բոքսի օրենքները չգիտեի, և եթե հանկարծ մտնեի ռինգ ու փորձեի Ձեզ հետ մենամարտել, միգուցե օրենքներից դուրս ինչ-որ բան անեի, որ հետագայում իմ դեմ կլիներ»,- նշեց Հակոբյանը։ Նա նաև Վահե Հակոբյանին նվիրեց բառարան, մեդալ ու հեռացավ դահլիճից։

«Ես կարծում եմ՝ այս երիտասարդն ապրել է իր կյանքի ամենաահավոր գիշերը, պատկերացնում եք՝ ինչ ապրումներ է ունեցել»,- նշեց Վահե Հակոբյանը։ Ինչ վերաբերում է Հրաչյա Հակոբյանին հրավերին՝ բանավիճելու եթերում, Վահե Հակոբյանը նշեց, որ նրան չի համարում «քաղաքակիրթ» և չի ցանկանում «ինքն իր ինտելեկտը վիրավորել»։

Հիշեցնենք, որ ավելի վաղ իմքայլական պատգամավոր Հրաչյա Հակոբյանը, անդրադառնալով Փաշինյանի այցի ժամանակ բողոքի ակցիա կազմակերպած սյունեցիներին բերման ենթարկելուն, նշել էր, որ «պետք է այ տենց ստորացնելով բերման ենթարկեն»: Սյունիքի նախկին մարզպետի մասին էլ ասել էր՝ Վահե Հակոբյան ա, Վահիկ ա, թե Վարսիկ ա՝ տալիս եմ նրան 24 ժամ ժամանակ։ Վահե Հակոբյանն էլ հակադարձել էր. «Քանի որ Հրաչուհին առաջարկել է ինձ տեղը, ժամը, ֆորմատը ես ընտրեմ, սիրով առաջարկում եմ հետևյալ ֆորմատը․ ամսի 25-ին՝ իրանց հորինած Քաղաքացու օրվա կապակցությամբ, հին, ավանդական, բարի բոքսը՝ բոքսի օրենքներով, ռինգում՝ ես, ինքը, մեկ դատավոր»: